ოსკარის შვიდგზის ნომინანტ გლენ ქლოუზს 2018 წელი ძალიან წარმატებული ჰქონდა. დამსახურებული ოქროს გლობუსის შემდეგ, მთელი სამყარო ელოდა რომ საბოლოოდ მსახიობს კინოაკადემიაც დააფასებდა და ოსკარსაც გადასცემდა.

თუმცა, მოვლენები სხვაგვარად განვითარდა და 2019 წლის ოსკარზე ქალის როლის საუკეთესო შემსრულებლად ოლივია კოლმანი დაასახელეს. აქვე უნდა ვთქვათ ისიც, რომ გამარჯვებას ოლივიაც არანაკლებ იმსახურებდა.

ოსკარზე კიდევ ერთხელ დამარცხების შემდეგ, გლენის შესახებ ახალი ამბავი მალევე გავრცელდა. მსახიობი ბილი უაილდერის ლეგენდარული ფილმის Sunset Boulevard რიმეიქში მთავარ როლს შეასრულებს.

თუმცა, როგორც აღმოჩნდა პროექტი ჯერ არ განხორციელდება, რადგან ლეგენდარულმა მსახიობმა კარიერაში დროებითი ტაიმ-აუტის აღება გადაწყვიტა და ახლა ერთადერთი რაც სურს დასვენებაა.

ინფორმაცია ამის შესახებ მსახიობმა თავის ინსტაგრამზე გაავრცელა:

გლენ ქლოუზი ვიდეოში გასული წლისთვის მადლობას იხდის და ამბობს, რომ ეს მისთვის კარიერის ერთ-ერთი ყველაზე მნიშვნელოვანი ეპიზოდი იყო. ასევე აღნიშნავს, რომ დამღლელი წლის შემდეგ ახლა ცოტა დასვენება და გადატვირთვა სჭირდება, რის გამოც დროებით კარიერაზე უარის თქმა უწევს.

ჩვენ ისღა დაგვრჩენია ვისურვოთ, რომ მსახიობის ტაიმ-აუტი დიდხანს არ გაგრძელდეს, მალე დაუბრუნდეს კინოს და გაგვანებივროს თავისი გენიალური თამაშით.

ამავე თემაზე: