ამერიკელი მსახიობი გლენ ქლოუზი ბილი უაილდერის ლეგენდარული ფილმის Sunset Boulevard რიმეიქში მთავარ როლს შეასრულებს.

აღსანიშნავია, რომ გლენმა ამავე ფილმის თეატრალურ დადგმაში უკვე მიიღო მონაწილეობა.

რიმეიქის რეჟისორი რობ ეშფორდი იქნება, რომელსაც აქამდე მხოლოდ თეატრში მუშაობის გამოცდილება აქვს.

ფილმის ორიგინალ ვერსიაში მთავარ როლს უხმო კინოს ვარსკვლავი გლორია სვენსონი ასრულებს.

მისი მოღვაწეობის პერიოდში უხმო კინო ხმოვანმა კინომ ჩაანაცვლა და ეს მსახიობის კარიერასა და ცხოვრებაზე ტრაგიკულად აისახა, შესაბამისად, შეიძლება ითქვას, რომ ბილი უაილდერმა მთავარ გმირში სწორედ სვენსონის პიროვნება გააცოცხლა.

ფილმში მოქმედება 1950-იანი წლების ჰოლივუდში მიმდინარეობს. მუნჯი კინოს ვარსკვლავი, ნორმა დესმონდის საკუთარ პოპულარობაში დარწმუნებულია, მაგრამ მუნჯი კინოს ეპოქა წარსულს ბარდება, მისი შეხედულებები კი დროსაა აცდენილი. ის სანსეტ ბულვარზე, მოსამსახურესთან ერთად ცხოვრობს და გარესამყაროსთან ერთადერთი დამაკავშირებელი სწორედ ის არის. ამასობაში ნორმა დესმონდი, სცენარის დასაწერად ქირაობს ჯო გილისს, რომელსაც ფინანსური პრობლემები აქვს, თუმცა მათი ურთიერთობა მალევე სახიფათო სახეს იღებს.

ამ ეტაოზე უცნობია როდის დაიწყება ფილმის გადაღებები, ერთადერთი რაც ფილმის შესახებ ვიცით, არის ის, რომ სანსეტ ბულვარის ახალი ვერსია მიუზიკლი იქნება.