ნაციონალური მოძრაობა მოითხოვს ხელისუფლებამ აფხახეთისთვის ელექტროენერგიის შესყიდვის დოკუმენტი გაასაჯაროოს. პარტიის წევრი სალომე სამადაშვილი აცხადებს, რომ საქართველოს ეკონომიკის სამინისტრომ რუსეთიდან 45 მილიონი კილოვატ-საათი ელექტროენერგია შეისყიდა აფხაზეთის ოკუპირებულ ტერიტორიაზე მისაწოდებლად.

სამადაშვილის თქმით, მაშინ, როცა რუსეთი ოკუპირებულ რეგიონში სამხედრო პოტენციალს აძლიერებს, საქართველოს ხელისუფლების მხრიდან არასწორია აფხაზეთის ენერგოსისტემის სუბსიდირება. მისი თქმით, სწორედა ამ მიზეზით საზოგადოებას უფლება აქვს ხელშეკრულების ყველა დეტალი იცოდეს.

ქართული ოცნების დეპუტატი რევაზ არველაძე განმარტავს, რომ თუ აფხაზეთი საქართველოსგან მიწოდებული ენერგიით რუსულ ბაზებს ამარაგებს იმას არ ნიშნავს, რომ მათ საქართველო ეხმარება.

"ეს არის ჩვენი ხალხი, ჩვენი ტერიტორია და რა თქმა უნდა, დარწმუნებულები ვართ, რომ სწორედ ვაკეთებთ ამ ამბავს", — განაცხადა არველაძემ.

ის ამბობს, რომ ხელშეკრულება არ უნახავს და მიაჩნია, რომ როცა მსგავსი შეთანხმების დეტალებზე პარლამენტის ინფორმირებული უნდა იყოს.

ეკონომიკის სამინისტროში On.ge-ს განუცხადეს, რომ აღნიშნულთან დაკავშირებით კომენტარს მოგვიანებით გაავრცელებენ.

ელექტროენერგიის დეფიციტი აფხაზეთში — საოკუპაციო რეჟიმის განმარტება

19 თებერვალს დე ფაქტო აფხაზეთის ენერგოკომპანიამ, ჩერნომორენერგომ გაავრცელა ინფორმაცია იმის შესახებ, რომ ენგურჰესზე, საიდანაც აფხაზეთს ელექტროენერგია მიეწოდება, წყლის დონემ დაიწია, რაც ელექტროენერგიის დეფიციტს გამოიწვევდა. მათი თქმით, ენგურჰესი მარტი-აპრილის პერიოდში 310 მილიონ კილოვატ-საათ ენერგიას გამოიმუშავებდა, აფხაზეთის მოსახლეობა კი 366 მილიონ კილოვატ-საათს მოიხმარდა.

ჩერნომორენერგო აცხადებდა, რომ 56 მილიონი კილოვატ-საათის ელექტროენეერგიის დეფიციტის არსებობის გამო აფხაზეთის ტერიტორიაზე 20 თებერვლიდან 11-დან 14-საათამდე ელექტროენერგია გაითიშებოდა. როგორც ისინი განმარტავდნენ, ელექტროენერგიის სრულყოფილად მიწოდება რუსეთიდან შესყიდვის შემდეგ აღსდგებოდა.

27 თებერვალს ჩერნომორენერგომ მოსხლეობას აცნობა, რომ ელექტროენერგიის დეფიციტი შეავსეს. მათ განცხადებაში აღნიშნული იყო, რომ შეთანხმება რუსეთის ხელისუფლებასთან შედგა.