სამოქალაქო განვითარების სააგენტოს (სიდა) ამჟამინდელმა ხელმძღვანელმა, სალომე ზურაბიშვილმა ყოფილ დირექტორს, ზვიად დევდარიანს გათავისუფლების შემდეგ ფული მისცა. ამის შესახებ ინფორმაცია ორგანიზაციის თანამშრომელმა ლიკა კასრაძემ გაავრცელა. ის წერს, რომ ზურაბიშვილმა ხელფასისა და იჯარის ფულის მიცემის შესახებ 13 თებერვალს თანამშრომლებთან შეხვედრის დროს ისაუბრა.

სალომე ზურაბიშვილი On.ge-სთან ყვება, რომ აღმასრულებელი დირექტორის მოვალეობის შესრულების დროს ზვიად დევდარიანს თანხა ფინანსური მენეჯერის დავალებით პირადი ანგარიშსწორებით მისცა. ზურაბიშვილი განმარტავს, რომ დევდარიანისთვის ნამუშევარი თვის ხელფასი იყო ასანაზღაურებელი. ამასთანავე, იმ დროს ორგანიზაცია ოფისს დევდარიანის ცოლისგან ქირაობდა და იჯარის ფულიც მას მისცა.

"როგორც მე მითხრა ფინანსურმა დირექტორმა, როცა რეესტრში დირექტორის ცვლილება აისახა, ბანკმა გადარიცხვები შეზღუდა. ამაზე მაქვს მტკიცებულებები", — აღნიშნა ზურაბიშვილმა.

თანხის გადაცემასთან დაკავშირებით On.ge ცდილობდა ზვიად დევდარიანს დაკავშირებოდა, თუმცა ის ჩვენს ზარებსა და სმს-ებს არ პასუხობს.

თანხის გადაცემის გარდა თანამშრომლები სხვა დარღვევებზე საუბრობენ. ამის გამო მათ 18 თებერვალს ორგანიზაციის გამგეობის წევრებს სალომე ზურაბიშვილის გათავისუფლების მოთხოვნით მიმართეს. წერილში საუბარია სავარაუდო ფინანსურ დარღვევებზე, დოკუმენტების გაყალბებაზე, შეწყვეტილ დაფინანსებაზე და ორგანიზაციის კრიზისულ მდგომარეობაზე. თანამშრომლები ამბობენ, რომ სალომე ზურაბიშვილი სიტუაციას ვერ უმკლავდება.

როგორც წერილშია ნათქვამი, ორგანიზაციაში წარმოშობილი კრიზისისა და სავარაუდო ფინანსური დარღვევების დაფარვის მცდელობის მიზეზით პროტესტის ნიშნად ორგანიზაცია დატოვა ექვსმა თანამშრომელმა.

ფინანსურ მაქინაციებთან დაკავშირებით ლიკა კასრაძემ რამდენიმე კვირის წინაც ისაუბრა. მისი თქმით, შემოსავლების სამსახურიდან მიიღო ინფორმაცია, რომლითაც გაირკვა, რომ მის ოფიციალურ შემოსავლად უფრო დიდი თანხა იყო მითითებული, ვიდრე ის, რეალურად, იღებდა.

მანვე აღნიშნა, რომ ორგანიზაციის საქაღალდეებში აღმოაჩინა ხელშეკრულებები, რომელიც მისი სახელით იყო დადებული, თუმცა ხელს მხოლოდ ერთ მათგანს აწერდა. კასრაძის თქმით, მსგავსი შემთხვევები აღმოაჩინეს ორგანიზაციის სხვა თანამშრომლებმაც.

ორგანიზაციის ხელმძღვანელმა, სალომე ზურაბიშვილმა მაშინ On.ge-ს უთხრა, რომ ამ საქმესთან დაკავშირებით პროკურატურას მიმართა. როგორც ზურაბიშვილმა თქვა, კასრაძის მიერ დასახელებული პერიოდი ემთხვევა ორგანიზაციის ხელმძღვანელის თანამდებობაზე ზვიად დევდარიანის მუშაობის დროს. დევდარიანი კი ამბობდა, რომ "სხვა პერიოდს ემთხვეოდა და კომენტარს ვერ გააკეთებდა".