სამოქალაქო განვითარების სააგენტოს თანამშრომელი, ლიკა კასრაძე ორგანიზაციებს ფინანსურ მაქინაციებში ადანაშაულებს. მისი თქმით, შემოსავლების სამსახურიდან მიიღო ინფორმაცია, რომლითაც ირკვევა, რომ მის ოფიციალურ შემოსავლად უფრო დიდი თანხა იყო მითითებული, ვიდრე ის, რეალურად, იღებდა.

"ამას ადასტურებს შემოსავლების სამსახურის მიერ გაცემული დოკუმენტი და შესაბამისი ამონაწერი იმ ბანკიდან, სადაც ხელფასი მერიცხება", — წერს კასრაძე ფეისბუქზე.

მისი თქმით, მან ორგანიზაციის საქაღალდეებში აღმოაჩინა ხელშეკრულებები, რომელიც მისი სახელით იყო დადებული, თუმცა ხელს მხოლოდ ერთ მათგანს აწერდა. კასრაძე ამბობს, რომ მსგავსი შემთხვევები აღმოაჩინეს ორგანიზაციის სხვა თანამშრომლებმაც.

ორგანიზაციის ხელმძღვანელი, სალომე ზურაბიშვილი On.ge-სთან საუბრის დროს ამბობს, რომ კასრაძის შესახებ იდენტური დოკუმენტები გამოითხოვა შემოსავლების სამსახურიდან. მისი თქმით, მანაც მიღებული დოკუმენტებით აღმოაჩინა, რომ რეალურ ხელფასსა და შემოსავლების სამსახურისთვის ნაჩვენებ მონაცემებში უზუსტობა იყო და ამის შესახებ პროკურატურასაც აცნობა.

როგორც ზურაბიშვილი ამბობს, კასრაძის მიერ დასახელებული პერიოდი ემთხვევა ორგანიზაციის ხელმძღვანელის თანამდებობაზე ზვიად დევდარიანის მუშაობის დროს. დევდარიანი On.ge-სთან საუბრისას ამბობს, რომ "სხვა პერიოდს ემთხვევა და კომენტარს ვერ გააკეთებს".

საქართელოს პროკურატურაში აცხადებენ, რომ საკითხს სწავლობენ და დანაშაულის ნიშნების გამოვლენის შემთხვევაში გამოძიებაც დაიწყება.