თურქეთში ხუთი ქართველი ფეხბურთელი ქურდობის ბრალდებით დააკავეს. CNN Turk-ის ცნობით, დაკავებულები კლუბ ცხინვალის ფეხბურთელები არიან და თურქეთში წინასასეზონო შეკრება ჰქონდათ.

როგორც გამოცემა წერს, შემთხვევა 20 თებერვალს მოხდა. ფეხბურთელებმა ნივთები ანტალიაში, სავაჭრო ცენტრში სპორტული აქსესუარების მაღაზიიდან მოიპარეს. მათივე ინფორმაციით, კონსულტანტებმა ქურდობის შესახებ დღის ბოლოს აღმოაჩინეს.

საქართველოს ფეხბურთის ფედერაციაში აცხადებენ, რომ გმობენ ყველა იმ ქმედებას, რომელიც ჩადენილია კანონსაწინააღმდეგოდ და ნეგატიურად აისახება არამხოლოდ ქართული ფეხბურთის, არამედ ქვეყნის რეპუტაციაზე.

"საქართველოს ფეხბურთის ფედერაცია — ფეხბურთის მმართველი ორგანო საქართველოში, რომლის ერთერთი მთავარი ფუნქციაა, არ დაუშვას ქართული ფეხბურთის იმიჯის შელახვა, როგორც ქვეყნის შიგნით, ისე საერთაშორისო მასშტაბით, მოუწოდებს საფეხბურთო კლუბ ცხინვალს, აღნიშნული ინფორმაციის დადასტურების შემთხვევაში, მისი უფლებამოსილების ფარგლებში, მიიღოს შესაბამისი ზომები კანონდამრღვევ პირებთან დაკავშირებით", — ვკითხულობთ განცხადებაში.

შინაგან საქმეთა სამინისტრომ On.ge-ს ქურდობის შემთხვევა დაუდასტურა. გარდა ამისა, On.ge დამატებით ინფორმაციას საგარეო საქმეთა სამინისტროსგან ელოდება.