საგარეო საქმეთა სამინისტროს საკონსულო დეპარტამენტის მოადგილემ, ვლადიმერ კონსტანტინიდმა განმარტა, რომ აშშ-ის 2019 წლის ფისკალური ბიუჯეტი არამხოლოდ საქართველოს მხარდაჭერას გამოხატავს, არამედ გზავნილია იმ ქვეყნებისადმი, რომლებშიც საქართველოს ოკუპირებული რეგიონების აღიარების რისკი არსებობს.

მისი თქმით, ამ ქვეყნების გადადგმული ნებისმიერი არასწორი ნაბიჯი, რომელიც საერთაშორისო სამართლის ნორმებს დაარღვევს აშშ-ის მხრიდან სანქციებს გამოიწვევს. კერძოდ, საუბარია ოკუპირებული რეგიონების აღარების შემთხვევაში ფინანსური დახმარების მოხსნაზე.

ამერიკის შეერთებულმა შტატებმა საქართველოს დახმარება 22 მილიონით გაუზარდა, რამაც 127 025 000 მილიონ დოლარი შეადგინა. ამის შესახებ ინფორმაცია აშშ-ის კონსოლიდირებული ასიგნებების აქტში (FY19 Consolidated Appropriations Act), იგივე აშშ-ს 2019 ფისკალური წლის ბიუჯეტშია ასახული.

ბიუჯეტში ასახულია ისიც, აშშ-ის მიერ გამოყოფილი რაიმე დაფინანსება არ შეიძლება გამოყენებულ იქნეს რუსეთის მიერ აფხაზეთისა და ცხინვალის რეგიონის ოკუპაციის მხარდასაჭერად.