ე.წ. წითელი ცხვირების საქმეზე დავის მხარეებს შორის მორიგებით დასრულების ხელშეწყობისთვის მოსამზადებელი სხდომა გადაიდო. მხარეებს სასამართლოს გარეშე მორიგე მოსამართლემ შესთავაზა, რაც მხარეებმა გაიზიარეს.

მოსამზადებელი სხდომა 4 აპრილს 12:00-ზე გაიმართება.

სამოქალაქო დავაში ერთ-ერთი მხარე, თეონა ბაღდავაძე აცხადებს, რომ მორიგება მხოლოდ მაშინ შედგება, თუ აკა სინჯიკაშვილი აღიარებს ცილისწამებას.

"დღევანდელ სხდომაზე მოსამართლემ სასამართლო დავის დასრულების ერთ-ერთ გზად მორიგება შემოგვთავაზა. თუმცა მორიგებაზე საუბარი შესაძლებელია მხოლოდ იმ შემთხვევაში, თუ ეს ადამიანი იტყვის, რომ ის ცილისმწამებლური დამოკიდებულება, რაც მას ჰქონდა ჩემ მიმართ, იყო არასწორი. სხვა შემთხვევაში მორიგება ვერ შედგება", — განაცხადა ბაღდავაძემ.

აკა სინჯიკაშვილისა და თეონა ბაღდავაძის დაპირისპირება ე.წ. წითელი ცხვირების საქველმოქმედო კამპანიის გარშემო 2017 წელს დაიწყო. გაყიდვებიდან შემოსული თანხა თავშესაფრის აშენებას და ლეიკემიით დაავადებული ადამიანის მკურნალობას უნდა მოხმარებოდა. წითელი ცხვირის ღირებულება ხუთი ლარი იყო.

აკა სინჯიკაშვილის მტკიცებით, კამპანიის ფარგლებში 15 ათასი წითელი ცხვირი გაიყიდა და 75 ათასი ლარის შემოსავალი მიიღეს. მისი თქმით, მას მხოლოდ 35 ათასი ლარი გადასცეს.

აღნიშნულ საქმესთან დაკავშირებით ფინანსურმა პოლიციამ სინჯიკაშვილის განცხადების საფუძველზე მოკვლევა დაიწყო. ფინანსურმა პოლიციამ ამ საქმეში დანაშაულის ნიშნები ვერ იპოვა და გამოძიება არ დაიწყო.

ამავე დროს ბაღდავაძე დავას აგრძელებს სასამართლოში. ის ითხოვს აკა სინჯიკაშვილმა მას და Red Nose Day Georgia-ს ბოდიში მოუხადოს და დღის ცენტრის ასაშენებლად მიღებული ფული დააბრუნოს. ბაღდავაძის თქმით, სინჯიკაშვილმა 35 ათას ლარამდე თანხა გაფლანგა.