პარლამენტის წევრი, ვანო ზარდიაშვილი, რომელიც ე.წ. მოსამართლეთა ლობირებაში არაერთხელ დაადანაშაულეს, ამბობს, რომ მოსამართლეებზე დიდი ქონება იუსტიციის უმაღლესი საბჭოს არამოსამართლე წევრებს აქვთ. ზარდიაშვილმა ანა დოლიძისა და ნაზი ჯანეზაშვილის შესახებ მოსამართლეების ქონებაზე საუბრისას თქვა.

"რატომ მოხდა მაინცდამაინც ამ საკითხის ახლა წამოწევა, ეს არის უცნაური. ასევე, მოვუწოდებ არასამთავრობო სექტორს, რადგან იუსტიციის უმაღლესი საბჭოს წევრების ქონება ამოიღეს და ეს გახადეს დასასაბუთებელი, მე გადავავლე თვალი ქალბატონი ნაზი ჯანეზაშვილის ქონებას, რომელიც საკმაოდ შთამბეჭდავად გამოიყურება და რუსთავი 2 თუ მოინდომებს, დამიჯერეთ, ქალბატონი ნაზის და ანას ქონება უფრო უკეთესად გამოიყურება, ვიდრე თამარ ალანიას თუ დიმიტრი გვრიტიშვილის თუ მამია ფხაკაძის ქონებები", — განაცხადა ზარდიაშვილმა.

მისი თქმით, მიხეილ ჩინჩალაძე 12 წელია მოსამართლეა და დაახლოებით 30 წელი საჯარო სამსახურში მუშაობს. მან 2004 წელს 100 ათასი დოლარის ოდენობის სესხი აიღო, ქონება კი 2006 და 2008 წელს შეიძინა.

მოსამართლეების ქონების შესახებ მასალა შაბათის კურიერმა მოამზადა. რუსთავი 2 წყაროზე დაყრდნობით ყვებოდა, რომ ძვირადღირებული ბინები მოსამართლე მიხეილ ჩინჩალაძის საკუთრებაა, თუმცა, ქონების დამალვის მიზნით, ის დედის და მამიდის სახელზეა რეგისტრირებული.

"ჩინჩალაძის ოჯახის აპარატამენტებს რამდენიმემეტრიანი თეთრი გალავანი აქვს შემოვლებული, მაღალი ლითონის კარით და განათებებით. გალავნის კუთხეში ერთი დამხმარე ნაგებობაა. მანქანით ეზოში შესული პირდაპირ ავტოფარეხში ხვდები. ბრიტანული არქიტექტურის გავლენით ჩინჩალაძის ოჯახმა სახლის მშენებლობა გასულ წელს დაასრულა", — აცხადებდა ჟურნალისტი.