აშშ-ს პრეზიდენტი დონალდ ტრამპი მექსიკის კედლისთვის დაფინანსების მოსაპოვებლად მექსიკის საზღვართან საგანგებო მდგომარეობის გამოცხადებას აპირებს. ამის შესახებ მან ჟურნალისტებთან პრესკონფერენციაზე განაცხადა. მისივე თქმით, საგანგებო მდგომარეობა სხვა პრეზიდენტებს აქამდეც გამოუცხადებიათ.

როგორც პრეზიდენტი ამტკიცებს, ის კედელს აშენებს არა იმისთვის, რომ წინასაარჩევნო დაპირება აასრულოს, არამედ იმისთვის, რომ ხელი შეუშალოს ნარკოტიკების გაყიდვასა და კრიმინალს.

"ჩვენ არ ვაკონტროლებთ ჩვენს საზღვრებს", — თქვა ტრამპმა და აღნიშნა, რომ პრესკონფერენციის დამთავრებისთანავე დოკუმენტს ხელს მოაწერს.

კედლის დაფინანსების საკითხი გახდა ყველაზე ხანგრძლივი 35-დღიანი ე.წ. შათდაუნის მიზეზი. ტრამპი ითხოვს, რომ კედლის აშენებისთვის ბიუჯეტიდან ხუთი მილიარდზე მეტი გამოუყონ, რასაც დემოკრატები ეწინააღმდეგებიან.