სამართლიანი არჩევნების (ISFED) აღმასრულებელი დირექტორი, მიხეილ ბენიძე ფიქრობს, რომ Facebook-ზე მამუკა ხაზარაძის დისკრედიტაციის მიზნით გავრცელებული პოსტების უკან სავარაუდოდ, ხელისუფლება დგას. საუბარია იმ პოსტებზე, რომლებიც ხაზარაძის დისკრედიტაციის მიზნით Facebook-ზე დღეს გამოჩნდა.

ბენიძე On.ge-სთან ამბობს, რომ ამ შემთხვევაში გვერდებისა და ცრუ მედიების მიზანია, პოზიტიურად წარმოაჩინონ საქართველოს ეროვნული ბანკი და მთავრობის მიერ გადადგმული ნაბიჯი. ის აღნიშნავს, რომ ზოგადად, მათი მიზანია, მთავრობის მოწინააღმდეგეების ან იმ ხალხის მიმართ, ვისაც შეიძლება ხელისუფლებისგან განსხვავებული მოსაზრებები ჰქონდეს, უარყოფითი დამოკიდებულება გაჩნდეს.

"ასეთი გვერდების მოქმედებების სტრატეგია მკვეთრად კოორდინირებულია, ზუსტად ერთსა და იმავე დროს, ამა თუ იმ საკითხის პარალელურად ხდება მათი მხრიდან კონკრეტული მადისკრედიტირებელი მესიჯების წამოწევა", — აღნიშნავს ბენიძე.

2018 წლის 20 დეკემბერს არასამთავრობო ორგანიზაცია სამართლიანმა არჩევნებმა ანგარიშში გამოაქვეყნა, რომლის მიხედვითაც, ეს გვერდები წინასაარჩევნო პერიოდში ნაციონალური მოძრაობისა და გრიგოლ ვაშაძის დისკრედიტაციის მიზნით აქვეყნებდნენ პოსტებს.