ასი ახალგაზრდა ევროპელი ელჩი ევროკავშირიდან და მისი ექვსი პარტნიორი ქვეყნიდან (აზერბაიჯანი, ბელარუსი, მოლდოვის რესპუბლიკა, სომხეთი, უკრაინა, საქართველო) მიმდინარე კვირაში ბრიუსელში ბოლო ათი წლის განმავლობაში აღმოსავლეთ პარტნიორობის მიღწევების აღსანიშნავად შეიკრიბება.

"ახალგაზრდები ჩვენს პარტნიორებთან ჩვენი ურთიერთობის ბირთვს წარმოადგენენ. ახალგაზრდა ევროპელი ელჩები უნიკალური ინიციატივაა - ეს არის პლატფორმა მოსაზრებების მოსასმენად და განსახილველად, რომელსაც მთელ რეგიონში მცხოვრები ახალგაზრდების ცხოვრებაზე დიდი გავლენა აქვს", - აღნიშნა აღმოსავლეთ სამეზობლოს საკითხებში ევროკომისიის დირექტორმა ლორენს მერედიტმა.

10-წლიანი ურთიერთობის შედეგად "ერაზმუს +"-ის მოხალისეთა, გაცვლებისა და ახალგაზრდობის მობილობის პროექტებში 30 000-ზე მეტი ახალგაზრდა მონაწილეობს, ხოლო 6 000-ზე მეტი ახალგაზრდა სარგებლობს შესაძლებლობებით, რომლებსაც ინიციატივა EU4Youth, 2018 წლიდან უზრუნველყოფს. ნიჭიერ ახალგაზრდა სტუდენტებს აღმოსავლეთ პარტნიორობის რეგიონიდან ახლა ასევე აქვთ შესაძლებლობა ევროკავშირის საზღვრებს გარეთ არსებულ ევროპულ სკოლაში ისწავლონ, რომელიც თბილისში 2018 წლის სექტემბერში გაიხსნა.

ახალგაზრდა ევროპელი ელჩების ჯგუფი სოციალური მედიის რამდენიმე ავტორიტეტულ პირთან ერთად ექვსივე ქვეყნიდან მოწვეულ ევროკავშირის ოფიციალურ წარმომადგენლებს პარტნიორობის მიღწევების და მისი სამომავლო გეგმების განსახილველად ხვდებიან. გარდა ამისა, ხუთშაბათს, 14 თებერვალს, ბრიუსელის ევროკავშირის კვარტალის ცენტრში ისინი მონაწილეობას მიიღებენ დიდ ფლეშ-მობში, რომელზეც ეროვნული ცეკვები და კოსტიუმები იქნება წარმოდგენილი.

ახალგაზრდა ევროპელმა ელჩმა საქართველოდან გენო ქუტაშვილმა აღნიშნა: "შემიძლია თამამად ვთქვა, რომ აღმოსავლეთ პარტნიორობამ მთლიანად შეცვალა ჩემი ცხოვრება (არა მარტო ჩემი, არამედ საქართველოს თითოეული მოქალაქის). ეს ერთობლივი ინიციატივა ყველა პროექტს შორის საუკეთესოა, რადგან ის მე და ჩემს ქვეყანას უამრავ საშუალებას გვთავაზობს. ახლა ჩემი ცხოვრება უკეთესია იმასთან შედარებით, რაც 10 წლის წინ იყო. ერთად უფრო ძლიერები ვართ!"

"ახალგაზრდა ევროპელი ელჩის" სტატუსი ევროკავშირიდან და აღმოსავლეთ სამეზობლოს ქვეყნებიდან ხუთასამდე ახალგაზრდას აქვს. ეს ელჩები რეგულარულად უწევენ ორგანიზებას ადგილობრივ საზოგადოებრივ ღონისძიებებს საკუთარ ქვეყნებში და ამ ინიციატივის შესახებ ინფორმაციის გასავრცელებლად საერთაშორისო ფორუმებში მონაწილეობენ.

ღონისძიება ორგანიზებულია "ევროკავშირის აღმოსავლეთ სამეზობლოს" პროექტის მიერ ევროკავშირის ინსტიტუტებთან თანამშრომლობით. აღმოსავლეთ პარტნიორობის საიუბილეო წლისთავის აღსანიშნავად მთელი წლის განმავლობაში რიგი სხვა ღონისძიებებია დანიშნული.

აღმოსავლეთ პარტნიორობა 2009 წელს დაწყებული ერთობლივი პოლიტიკური ინიციატივაა, რომლის მიზანიც ევროკავშირსა და მის აღმოსავლეთ სამეზობლოს ექვს ყვეყანას შორის (აზერბაიჯანი, ბელარუსი, მოლდოვის რესპუბლიკა, საქართველო, სომხეთი და უკრაინა) ურთიერთობის გაღრმავებაა. გასული ათი წლის განმავლობაში კოლექტიურმა ძალისხმევამ ამ ქვეყნების მოქალაქეებს მნიშვნელოვანი სარგებელი მოუტანა, მათ შორის ვაჭრობის, მობილობის, ეკონომიკური განვითარებისა და ცხოვრების ხარისხის გაუმჯობესების კუთხით.

დამატებითი ინფორმაციისათვის შეგიძლიათ ეწვიოთ: