კვირის დასაწყისში ავსტრალიელმა მუსიკოსმა Sia-მ საზოგადოებას ახალი შთამბეჭდავი კლიპი წარუდგინა, რომელიც 12 ივნისს ორლანდოს გეი კლუბში მოკლულ 49 ადამიანს ეძღვნება.

მუსიკალურ ვიდეოში, სახელად The Greatest (ყველაზე დიდებული), ამერიკელ ბალერინა მედი ზიგლერთან ერთად სიმბოლურად 49 მოცეკვავე მონაწილეობს. კლიპის დასაწყისში თეთრით შავზე ვხედავთ ჰეშტეგს #WeAreYourChildren (ჩვენ შენი შვილები ვართ).

მომდევნო კადრში ვხედავთ მოცეკვავეს, რომელიც ამჯერად შავ პარიკს ატარებს. ის ნამტირალევ სახეს იწმენდს და სახეზე ცისარტყელას კვალი რჩება.

"49 ადამიანის ლამაზი სიცოცხლე დასრულდა. ეს შენ გეძღვნება" - წერს The Greatest-ში მონაწილე ერთ-ერთი მოცეკვავე ინსტაგრამზე.

კლიპში ახალგაზრდა მოცეკვავეები მოძრაობენ და ირწევიან, რაც გამოხატავს ღამის კლუბის სიტუაციას, სანამ ისინი მიწაზე დაეცემიან. მათ უკან დახვრეტილ კედელზე კი სროლის კვალი ჩანს.

იდუმალებით მოცული ავსტრალიელი მომღერლის გუნდიდან ჯერ არავის განუცხადებია, რა მნიშვნელობას ატარებს ახალი ვიდეო, რომელშიც Sia დაბრკოლებებსა და შინაგან სიძლიერეზე მღერის და მსმენელს მოუწოდებს, რომ არ დანებდეს.