დამამცირებელი და არაადამიანური მოპყრობისთვის ბრალდებულმა, მარნეულის მერმა თემურ აბაზოვმა თანამდებობის დატოვების მოთხოვნით მარნეულის საკრებულოს მიმართა. ამის შესახებ ინფორმაცია თემურ აბაზოვმა On.ge-ს დაუდასტურა.

აბაზოვის თქმით, გადაწყვეტილება დამოუკიდებლად მიიღო და პარტია ქართული ოცნებიდან შესაბამისი მითითება არ მიუღია.

"მივიჩნიე, რომ ასეთ პროვოკაციაში მოხვედრილი საჯარო მოხელე ჯობია არ იყოს თანამდებობაზე, ბრალდებულის პოზიციაში ვარ და ვამჯობინე, რომ დამეტოვებინა თანამდებობა", — განაცხადა თემურ აბაზოვმა.

თემურ აბაზოვი არაადამიანური მოპყრობის ბრალდებით მიმდინარე წლის 13 ივნისს დააკავეს, მას შემდეგ, რაც სტუდია მონიტორის საგამოძიებო მასალ გავრცელდა. მასალაში ასახული იყო, რომ მოქალაქე, რომელმაც საქართველოს ყოფილ პრემიერს, ბიძინა ივანიშვილისა და მარნეულის მერს, თემურ აბაზოვს აგინა, ძალადობის მსხვერპლი გახდა.

"გავრცელდა ვიდეოები, სადაც ეს მოქალაქე ბოდიშს იხდის და სახეზე, სავარაუდოდ, შარდს ისვამს", — აღნიშნულია სტუდია მონიტორის მიერ გავრცელებულ მასალაში.

ამავე მოქალაქეზე ცემის ბრალდებით სისხლის სამართლებრივი დევნა დაიწყო პარლამენტის წევრის, პარტია ერთიანი ნაციონალური მოძრაობიდან — აზერ სულეიმანოვის, მარნეულის მუნიციპალიტეტის საკრებულოს წევრის, პარტია ქართული ოცნებიდან — რამინ ალახვერდიევის და მარნეულის მერის ნათესავის, მოქალაქე ე.გ-ს მიმართ.

აბაზოვი 13 დეკემბერს აღკვეთის ღონისძიება პატიმრობა 10 000-ლარიანი გირაოთი შეეცვალა.