Facebook-ზე გავრცელდა ფოტო, სადაც არქიმანდრიტი ათანასე კარანაძე ბენტლის მართავს. სასულიერო პირი ფოტოს შინაარსს ფეისბუქის საშუალებით გამოეხმაურა. ის განმარტავს, რომ მანქანა მისი არ არის.

"გუშინ შუადღეს დაიდო ჩემი სურათები, სადაც მე რომპეტროლის ბენზინგასამართ სადგურზე მანქანაში ვზივარ და ვასხამ საწვავს. აღნიშნული მანქანა არის 2006 წლის Bentli , რომელიც ეკუთვნის ჩემს ახლობელ ადამიანს. თუნდაც ცნობისმოყვარეობის მიზნით, რომ დავმჯდარიყავი საჭესთან და მანქანა გამეტარებინა, ეს ხომ არ ნიშნავს რომ ჩემი კუთვნილებაა, ხვალ რომ Porsche-ს საჭესთან დავჯდე, ასევე, ანალოგიური ცნობისმოყვარეობით, რომელიც ჩემს ბევრ ახლობელ ადამიანს ჰყავს ე.ი ჩემია?" — წერს მამა ათანასე.

მისი თქმით, საზოგადოება გაბოროტებულია და სხვისი ცხოვრებით ცხოვრობს, თავის ნაჭუჭშია ჩაკეტილი და ერთი სული აქვს ვინმე რაიმეთი გააკრიტიკოს და მიწასთან გაასწოროს.

"მე ამას გულისტკივილით ვამბობ, ღმერთმა დამიფაროს ვინმეს წარმატება და კეთილდღეობა შემშურდეს. ისე ცნობისათვის, ვისაც დააინტერესებს ჩემი პიროვნება შეგიძლიათ Facebook-ზე ნახოთ ჩემი მონასტერი და თუ გექნებათ სურვილი, შემდგომში მობრძანდეთ და ადგილზე დაათვალიეროთ და ნახოთ, რა იყო 6 წლის წინ და ამჟამად როგორ გამოიყურება", — ამბობს არქიმანდრიტი.