ქართული ოცნების დეპუტატი, ლევან გოგიჩაიშვილი იურიდიულ საკითხთა კომიტეტს ურჩევს, რომ მოსამართლეების უვადოდ დანიშვნაზე მორატორიუმის გამოცხადების კანონპროექტი დაჩქარებულ ვადებში განიხილოს. მისი თქმით, კომიტეტს იუსტიციის საბჭოს ხელში ვერ ჩაუგდებენ და ვერ დაუშვებენ, რომ კომიტეტი იქცეს იუსტიციის საბჭოს ფილიალად.

"ძალიან ცუდად ჩანს. შესაძლოა, რისიც გვეშინოდა, ის რეალობა დადგეს. შესაძლოა, იუსტიციის საბჭოს ფილიალი იყოს იურიდიული კომიტეტი. ამას არ დავუშვებთ. ვერ ჩავაგდებთ იუსტიციის საბჭოს ხელში. ჩვენ ნუ გვეჯიბრებიან, შეასრულონ დაკვეთა, რომელიც არის საზოგადოებაში", — განაცხადა ლევან გოგიჩაიშვილმა.

გოგიჩაიშვილის თქმით, ყველაზე მეტად, ვისაც "მოხვდა" ეს კანონპროექტი არის იუსტიციის საბჭო.

"კომიტეტი არის ინსტრუმენტი იუსტიციის საბჭოს ხელში, რომ ხელში ჩაიგდოს სასამართლო. ჩვენი კინოპროექტი არის მორატორიუმის პროექტი, რომელსაც მივაყოლებთ კანონპროექტს თუ როგორ უნდა დარეგულირდეს სხვა ნიუანსები, სად უნდა იყოს ეს ხალხი, როგორ უნდა იყოს. იქიდან გამომდინარე, რომ ბუნდოვანია კანონმდებლობა და სარგებლობდა იუსტიციის საბჭო, ნახევარი სამოსამართლეო კორპუსი უკვე უვადოდაა დანიშნული, მაგრამ ნახევარი დასანიშნია, 48 ადამიანის სია დევს საბჭოში. ჩვენ ეს პროცესი უნდა შევაჩეროთ", — განაცხადა გოგიჩაიშვილმა. ის დარწმუნებულია, რომ შეძლებენ კომიტეტის "გადარჩენას" და ამისთვის ყველა საშუალებას გამოიყენებენ.

"მოვახერხებთ, რომ იუსტიციის საბჭოს ფილიალად არ იქცეს კომიტეტი. ჩვენ გამოვიყენებთ ყველა ინსტრუმენტს, რომ კომიტეტმა, რომელიც ადგას ფილიალიზაციის გზას შეინარჩუნოს სახე. ამ საკითხის მიტოვება ამ ქვეყნის მიტოვებას ნიშნავს", — განაცხადა გოგიჩაიშვილმა.

საპარლამენტო უმრავლესობის დეპუტატების ნაწილი, მათ შორის ეკა ბესელია და მისი მხარდამჭერები მოსამართლეების უვადოდ დანიშვნის შეჩერების მოთხოვნით საკანონმდებლო ინიციატივა წამოაყენეს. საკანონმდებლო ინიციატივით უნდა შეჩერდეს მოსამართლეების გამწესება უვადოდ, პირველ და მეორე ინსტანციაზე ანუ საქალაქო და სააპელაციო სასამართლოებშ. იუსტიციის საბჭოს ზოგიერთი წევრი აღნიშნულ ინიციატივას არაკონონიერს უწოდებს.