შს მინისტრის გიორგი მღებრიშვილის გუშინდელ განცხადებას იმასთან დაკავშირებით, რომ დემურ სტურუას საქმესთან დაკავშირებით პოლიციის ინსტიტუტის პოლიტიკურ პროცესში ჩართვა არასწორია, დღეს პოლიტიკოსები გამოეხმაურნენ.

ოპოზიციის წარმომადგენლები შინაგან საქმეთა მინისტრს დაგვიანებულ განცხადებაში სდებენ ბრალს. მათი თქმით, მინისტრს მოხსენება არ წარუდგენია დემურ სტურუას მკვლელობასთან დაკავშირებითაც.

პარტია თავისუფალი დემოკრატების გენერალური მდივანი ალექსი პეტრიაშვილი აცხადებს, რომ შინაგან საქმეთა მინისტრს არაფერი ახალი არ უთქვამს და მან ყურადღება უნდა გაამახვილოს იმ მანკიერ მხარეებს და პრობლემებზე, რომლებიც დღეს სამინისტროს აქვს.

პაატა ბურჭულაძის მრჩეველი სამართლებრივ საკითხებში დავით ჯანდიერი მინისტრს დემურ სტურუას თვითმკვლელობაში ბრალდებული პოლიციელის მიმალვის ფაქტს ახსენებს:

"აბსოლუტურად არაადეკვატური იყო შინაგან საქმეთა მინისტრის მხრიდან საკუთარ და სხვის პოლიციელებად დაყოფა. ეს განცხადება მთელი ინსტიტუტისთვის შეურაცხმყოფელია".

ფრაქცია ქართული ოცნების თავმჯდომარე გიორგი ვოლსკი აცხადებს, რომ ქვეყნის დესტაბილიზაციით მხოლოდ ერთიანი ნაციონალური მოძრაობაა დაინტერესებული და მინისტრების განცხადებები ყოველთვის ადეკვატურია.

ამავე ფრაქციის წარმომადგენელი ოთარ ნიშნიანიძე განმარტავს, დღეს ისეთი არაფერი ხდება რაც ადრე არ ხდებოდა და ძველი ხელისუფლების დროს კიდევ უარესი მდგომარეობა იყო:

"მინისტრის განცხადება ბუნებრივია. რა თქმა უნდა უნდა დაიცვას მან პოლიციელი მუნდირის ღირსება, ეს ჩვეულებრივი ამბავია და ჩვენი მოქალაქეებიც".

შინაგან საქმეთა მინისტრმა სპეციალური განცხადება გუშინ გააკეთა, სადაც დემურ სტურუასა გარდაცვალებისა და უკანასკნელი დღეების განმავლობაში მომხდარ კრიმინალურ ფაქტებს გამოეხმაურა. მან განმარტა, რომ ყველა დანაშაული ცხელ კვალზეა გახსნილი.