ილიაუნის ბიზნესკოლის ყოფილი დეკანი გიორგი ქადაგიძე აქციაზე სტუნდეტების მიერ მისი მისვლის მოთხოვნას გამოეხმაურა. ქადაგიძის თქმით, ის სრულად იზიარებს და მხარს უჭერს სტუნდეტების მოთხოვნებს, თუმცა "იარლიყების მიწეპების" ასარიდებლად აქციაზე არ მიდის.

"ფიზიკურად არ ვარ სტუდენტებთან ერთად მხოლოდ იმიტომ რომ არ მოხდეს თემით სპეკულაცია და ვერ შეძლონ წმინდა სტუდენტური პროტესტის რაიმე ფორმით დისკრედიტაცია", — წერს ქადაგიძე ფეისბუქგვერდზე.

მისივე თქმით, სტუდენტური პროტესტი არის საუნივერსიტეტო ცხოვრების განუყოფელი და ძალიან ღირებული ნაწილი და ბიზნესის სკოლა იმსახურებს ცალკე დამოუკიდებელ ერთეულად ყოფნას.

ილიას სახელმწიფო უნივერსიტეტის ბიზნესის სკოლის სტუდენტები რეორგანიზაციის პროცესის შეჩერების მოთხოვნით საპროტესტო აქციას მართავენ. ისინი ლექტორების მხარდაჭერას და გიორგი ქადაგიძის აქციაზე მისვლას ითხოვდნენ.

31 იანვარს გიორგი ქადაგიძემ განაცხადა, რომ უნივერსიტეტისთვის ცვლილებები და ძირეული სიახლეები მიუღებელია და თანამდებობიდან მოხსნეს. უნივერსიტეტის რექტორის, გიგა ზედანიას თქმით, სტრუქტურული რეფორმაში მონაწილეობაზე გიორგი ქადაგიძე უარს ამბობდა. უნივერსიტეტში ახალი ფაკულტეტი მენეჯმენტის, ტექნოლოგიებისა და განათლების ფაკულტეტი შეიქმნა, რომლის ნაწილიც ბიზნესსკოლა გახდა.