მსახიობი გურანდა გაბუნია 80 წლის ასაკში ავადმყოფობის შედეგად გარდაიცვალა. ინფორმაცია On.ge-ს კულტურის სამინისტროში დაუდასტურეს.

მსახიობს ათობით როლი აქვს შესრულებული ქართულ კინოში. ის მონაწილეობდა ისეთ ფილმებში, როგორიცაა "მზე შემოდგომისა", "დათა თუთაშხია", "თოჯინები იცინიან" და სხვა. მოღვაწეობის სხვადასხვა პერიოდში ის იყო მარჯანიშვილის, რუსთაველისა და რუსთავის თეატრის მსახიობი. გურანდა გაბუნია ასევე მონაწილეობდა პოპულარულ სერიალში "ჩემი ცოლის დაქალები".

გურანდა გაბუნიამ საქართველოს თეატრალური ინსტიტუტის სამსახიობო ფაკულტეტი 1960 წელს დაამთავრა. მას მიღებული აქვს საქართველოს სახალხო არტისტი წოდებაც. 2018 წელს, კულტურის იმდროინდელმა მინისტრმა გურანდა გაბუნიას ხელოვნების ქურუმის წოდება მიანიჭა.