26 იანვარს, გუდაურის 30 წლის იუბილის აღსანიშნავად ჩატარდა სპეციალური ღონისძიება White Rabbit პარკში მათთვის, ვისაც უყვარს აქტიური დასვენება, თოვლი, სრიალი და თავგადასავლები. ღონისძიებაზე მისულ სტუმრებს, საშუალება ჰქონდათ დაეთვალიერებინათ გამოფენა, სახელწოდებით "ევოლუცია" - გუდაური 30 წლის წინ და დღეს.

აქ წარმოდგენილი იყო ძველი და თანამედროვე თხილამურები, ეკიპირება, აქსესუარები. გზა ხის თხილამურიდან "სნოუბორდებამდე" არც თუ ისე გრძელია, თუმცა, სავსე თავგადასავლებით და საინტერესო ისტორიებით. საქართველოში კი ეს ისტორია გუდაურის და იმ ადამიანების გარშემო ტრიალებს, რომლებმაც სათხილამურო სპორტის განვითარებაში, როგორც პროფესიონალებში, ასევე მოყვარულებში, დიდი წვლილი შეიტანეს.

ამ დღეს ჩატარდა ცერემონია, რომლის ფარგლებშიც გუდაურის პირველი მწვრთნელები დააჯილდოვეს იმ წვლილისთვის, რომელიც მათ შეიტანეს სამთო - სათხილამურო სპორტის განვითარებაში და აღზარდეს თაობები. მათ შორის იყვნენ: დიმიტრი გუგუნავა, დიმიტრი თოფურია, ლევან ლორთქიფანიძე, დავით ჯაფარიძე, კოტე ქადაგიძე, ირაკლი ჭირაქაძე, კოტე გაბრიჩიძე, ლადო ანთაძე, სანდრო ანთაძე, ზაზა იაშვილი, დუდა ჭიჭინაძე, რამაზ მოსეშვილი და გელა მიქაბერიძე.

"ჩვენთვის დიდი პატივია იმ ადამიანების დაჯილდოება, რომელთა აქტიურობამ, თავდადებამ, დიდმა სიყვარულმა შექმნა და მოიტანა აქამდე გუდაური და ყველა ის აქტივობა, რომელიც გუდაურთან არის დაკავშირებული", - განაცხადა ორგანიზატორი კომპანიის წარმომადგენელმა, "ბორჯომის" უფროსმა ბრენდ მენეჯერმა, ირინა კეიდიამ.

მისი თქმით, კომპანია ყველაფერს აკეთებს იმისთვის, რომ ადამიანები შთააგონოს, იცხოვრონ უფრო ნათელი, ხალისიანი, აქტიური ცხოვრებით, გამოყენონ ყველა შესაძლებლობა, აღმოაჩინონ და სცადონ რამე ახალი ცხოვრებაში პირველად.

"სწორედ ამ განწყობას აერთიანებს ბრჭყვიალა ფერები ჩვენი პროდუქციის ზამთრის ლიმიტირებულ შეფუთვაზე და ვებ-რესურსი, რომელიც ექსტრიმის მოყვარულებისთვის განახლდა და ზამთრის აქტივობებზე გადაეწყო. აქ ნებისმიერი ტურისტი ან ადგილობრივი იპოვის მისთვის საინტერესო ინფორმაციას აქტიური დასვენების შესახებ საქართველოში, როგორც ზამთრის ასევე, ზაფხულის სეზონის დროს. ვებ-გვერდი მრავალფუნქციურია, მრავალენოვანი და მუდმივად განახლებადი. "ბორჯომის" მიზანია ადამიანი დაიმუხტოს ვულკანური ენერგიით, მიიღოს მაქსიმალური სიამოვნება ცხოვრებისგან და გაატაროს ზამთარი ისე როგორც არასდროს", - დაამატა მან.

გუდაურში 30 წლის იუბილისადმი მიძღვნილი პრეზენტაცია ფრისტაილერების სპეციალური პერფორმანსით დასრულდა. რაიდერებმა მრავალფეროვანი, ექსტრემალური ტრიუკებით სავსე დაშვება განახორციელეს როგორც სნოუბორდებით, ასევე თხილამურებით.

ღონისძიების ორგანიზატორი ქართული მინერალური წყლის ბრენდი "ბორჯომი", ხოლო პარტნიორი საქართველოს მთის კურორტების კომპანია იყო.

ზუსტად 30 წლის წინ დაარსებული და ევროპულ სტილზე გაშენებული გუდაური დღესაც აქტიური დასვენების, სრიალის, ექსტრიმის, გართობის და ზამთრის დღესასწაულების მექაა.