NDI-ის მიერ ჩატარებული საზოგადოებრივი კვლევით, საქართველოში გამოკითხულთა 91 პროცენტი ამბობს, რომ მათთვის მისაღებია ინიციატივა, ყველა ოჯახმა დაახარისხოს ნაგავი კატეგორიების მიხედვით. გამოკითხულთა მხოლოდ 6 პროცენტი ამბობს, რომ ეს ინიციატივა მიუღებელია.

კვლევით, მაღალი დადებითი შედეგი აჩვენა როგორც დედაქალაქმა, ისე სხვა ქალაქებმა. იმავე კითხვაზე თბილისში გამოკითხულთა 94 პროცენტისთვის არის მისაღები ნარჩენების დახარისხება. ასევე 94 პროცენტისთვისაა მისაღები აღნიშნული ინიციატივა დიდ ქალაქებში გამოკითხულებისთვის, პატარა ქალაქებში კი 93 პროცენტისთვის.

მცირედით განსხვავებული სიტუაციაა უმცირესობათა დასახლებებში, სადაც გამოკითხულთა 64 პროცენტი უჭერს მხარს ნაგვის დახარისხებას ყველა ოჯახში, ხოლო ეს ინიციატივა მიუღებელია 18 პროცენტისთვის.

NDI-იმ საზოგადოებრივი აზრის ახალი კვლევა გამოაქვეყნა. საველე სამუშაოების თარიღები 2018 წლის 6-20 დეკემბრით თარიღდება. ჩატარდა 2 205 დასრულებული ინტერვიუ. საშუალო ცდომილების ზღვარი +/- 2,1 პროცენტია.