იუსტიციის უმაღლესი საბჭოს არამოსამართლე წევრი, ანა დოლიძე ერთ-ერთია მათ შორის, ვინც მოსამართლეების არჩევის წესთან დაკავშირებით სამუშაო ჯგუფის შეხვდრას ესწრება. როგორც მან ჟურნალისტებთან საუბრისას განმარტა შეხვედრაზე კითხვებით მივიდა.

"მე ვაპირებ ირაკლი კობახიძეს დავუსვა კითხვა რატომ ხარჯავს ჩვენს ათასობით ლარს ირაკლი კობახიძის და ლევან მურუსიძის ძმაკაცების შეკრებაში. თუ ამ საძმაკაცოს უნდა შეიკრიბონ, შეიკრიბონ რესტორნებში და საკუთარ სახლებში. ჩვენ დღეს აქ შევიკრიბეთ, რომ სახელმწიფო სახსრები დავხარჯოთ იმაში, რომ ამ ორმა ჯგუფმა ერთმანეთში დაალაგოს სასამართლოს ბედი", — აღნიშნა დოლიძემ.

დღეს, 27 იანვარს არასამთავრობო ორგანიზაციებისა და მოქალაქეების ნაწილი სასამართლო სისტემაში რეალური ცვლილებების მოთხოვნით საპროტესტო აქციას მართავენ. მათი ერთ-ერთი მოთხოვნა სისტემიდან მურუსიძე-ჩინჩალაძის კლანისა და იუსტიციის უმაღლესი საბჭოდან მურუსიძის უვადოდ დამნიშვნელი წევრების წასვლაა.

პროტესტის ადგილად რედისონ ბლი ივერია შეირჩა, სადაც იმავე დროს იმ სამუშაო ჯგუფის შეხვედრა იმართება, რომელიც უზენაესი სასამართლოს მოსამართლეების არჩევის კრიტერიუმებზე იმუშავებს. არასამთავრობო ორგანიზაციების ნაწილმა პროტესტის ნიშნად თქვა უარი სამუშაო ჯგუფის მუშაობაში ჩართვაზე.

ამავე თემაზე: "ქელეხის თამადა" — აქციაზე შეკრებილები ლევან მურუსიძეს შეძახილებით შეხვდნენ