თბილისის სააპელაციო სასამართლოს მოსამართლე, ვეფხია ლომიძე ამბობს, რომ იუსტიციის უმაღლესი საბჭოს წევრები, ანა დოლიძე და ნაზი ჯანეზაშვილი ებრძვიან სასამართლო სისტემას. მან მათზე საუბრის დროს დათა თუთაშხიაც გაიხსენა.

"ანა დოლიძე და ნაზი ჯანეზაშვილი ჩვენ მოგვმართავენ, როგორც თუთაშხია მიმართავდა არქიფო სეთურის მიერ დაბეჩავებულ ხალხს", — თქვა მოსამართლემ.

მან აღნიშნა, რომ ანა დოლიძე და ნაზი ჯანეზაშვილი მოსამართლეებს შორის თანამოაზრეების ძებნას ცდილობენ.

"მათ არ აქვთ მორალური უფლება, რომ ამგვარი ტექსტით მოგვმართონ... ისინი ამაოდ ცდილობ ჩვენ შორის თანამოაზრეების ყოლას", — განმარტა მან.

თბილისში, იუსტიციის უმაღლეს სკოლაში მოსამართლეთა 25-ე კონფერენცია იმართება. ისინი აფასებენ სასამართლო სისტემის მიმართ გამოთქმულ კრიტიკულ მოსაზრებებს. ყოველი გამომსვლელის შემდეგ ისმის ტაშის ხმა.

კონფერენციის ბოლოს მოსამართლეებმა საერთო განცხადება გაავრცელეს, სადაც ბოლო პერიოდში მართლმსაჯულების სისტემაში განვითარებულ მოვლენებს აფასებენ. მათ შორის, უზენაესი სასამართლოს მოსამართლეების არჩევის საკითხს.

მოსამართლეები აცხადებენ, რომ უნდა შეწყდეს ზეწოლა სასამართლო ხელისუფლებაზე და მიეცეს მას შესაძლებლობა მშვიდ გარემოში განაგრძოს საქმიანობა.