რუსთავი 2-ის ინფორმაციით, ქიბარ ხალვაშის ადვოკატი, პაატა სალია რუსთავი 2-ის მიერ გუშინ გასაჯაროებული დოკუმენტის ავთენტურობას არ ადასტურებს და განმარტავს, რომ მას კავშირი არ აქვს დღეს ჩანიშნულ პროცესთან და ახალი გარემოებაც უზენაესმა სასამართლომ არ უნდა გაითვალისწინოს:

"ქიბარ ხალვაში ცალსახად გამორიცხავს და კატეგორიულად უარყოფს მსგავსი შეთანხმების არსებობას ირაკლი ოქრუაშვილთან და რაიმე დოკუმენტზე ხელმოწერას. ის, რაც იყო რუსთავი 2-ის ეთერით ნაჩვენები, არის ყალბი დოკუმენტი. მიგვაჩნია, რომ ეს არის მოგვიანებით, ახლახანს შექმნილი დოკუმენტი, რომელზეც ხელმოწერა არ ეკუთვნის ქიბარ ხალვაშს".

სალია აცხადებს, რომ თუ მხარეს დოკუმენტის ორიგინალი აქვს, მისი ავთენტურობის დასადასტურებლად, შეიძლება ექსპერტიზის ჩატარება და დადგენა, ეკუთვნით თუ არა ხელმოწერები აღნიშულ პირებს.

4 სექტემბერს რუსთავი 2-ის ჟურნალისტმა, ნოდარ მელაძემ P. S.-ში განაცხადა, რომ მას გადასცეს დოკუმენტი, რომელშიც ჩანს, რომ ტელეკომპანიის წილის მფლობელი ირაკლი ოქრუაშვილია და არა ქიბარ ხალვაში. მისი განმარტებით, 5-პუნქტიანი შეთანხმება 2010 წლის თებერვალშია გაფორმებული.