Stranger Things მეორე სეზონისთვის ემზადება

გულზე ხელი დაიდეთ და ისე თქვით, რომელი თქვენგანი არ ეთანხმება იმას, რომ Netflix-ის ახალმა სერიალმა Stranger Things ნამდვილი ფურორი მოახდინა და გამოსვლის დღიდან ბევრისთვის საყვარელი სერიალი თუ არა, მინიმუმ დროის გაყვანის ყველაზე კარგი საშუალება მაინც გახდა.

სანამ კითხვას განაგრძობთ, გირჩევთ აუცილებლად ჩართოთ სერიალის ქუდის საუნდტრეკი.

ცოტა ხნის წინ Netflix-მა და შოუს შემქმნელმა ძმებმა მეთ და როს დიფერებმა ოფიციალურად დაადასტურეს, რომ სერიალის მეორე სეზონისთვის უკვე ემზადებიან და რამდენიმე გამოცემასთან სამომავლო გეგმების შესახებაც ისაუბრეს.

თუ შოუ ჯერ არ გინახავთ (რაც წარმოუდგენელია), იცოდეთ რომ ქვემოთ აუცილებლად შეგხვდებათ სპოილერი!

ერთ-ერთი მთავარი, რაც ახალ სეზონთან დაკავშირებით გაირკვა, არის ის, რომ შოუს ახალ სეზონში აუცილებლად ვიხილავთ დოქტორ ბრენერს. “პირველ სეზონში ჩვენ ვნახეთ, რომ ბრენერის პერსონაჟს თავს ესხმის მონსტრი, შემდეგ კი ისინი ერთიანდებიან. ვფიქრობთ, რომ ეს პერსონაჟი უფრო მეტ დროს იმსახურებს შოუში, ამიტომ დიახ, დიდი ალბათობით, მას ჩვენ აუცილებლად ვნახავთ შემდეგ სეზონშიც”.

როგორც გაირკვა, ძმები დიფერები ბარბარას პერსონაჟის დავიწყებას არ აპირებენ. მეთ დიფერი გვპირდება, რომ მის ხაზს აუცილებლად გააგრძელებენ და ის აუცილებლად იძიებს შურს.

“პირველ სეზონში სიუჟტი ფაქტობრივად ერთი კვირის განმავლობაში ვითარდება. ეს კი ძალიან ცოტა დროა იმისთვის, რომ მოჰყვე და განმარტო ყველაფერი რაც გინდა. ჩვენ გადავწყვიტეთ მეორე სეზონში განვიხილოთ და უფრო გასაგები გავხადოთ ის, რაც პირველ სეზონში მოხდა”, ამბობს რეჟისორი.

Netflix-ში ამბობენ, რომ მეორე სეზონის გადაღება დამოკიდებული იყო იმაზე, თუ რა რეაქცია ექნებოდა მაყურებელს, და რადგანაც ახალი სეზონი უკვე დამტკიცებულია, შეგვიძლია ვთქვათ, რომ რეაქციამ გაამართლა.

აღსანიშნავია ისიც, რომ სერიალის მეორე სეზონში ძველ პერსონაჟებს სამი ახალი დაემატება. სერიალის კასტინგ მენეჯერის თქმით, მეთი და როსი სამ მსახიობს ეძებენ, რომლებიც ახალ პერსონაჟებს - მაქსს, ბილის და რომანს ითამაშებენ.

მაქსი 13 წლის გოგონაა, რომლის ქცევებიც ძალიან განსხვავდება მისი თანატოლი სხვა გოგონებისგან. ეს შეიძლება გამომდინარეობს მისი რთული წარსულიდან და მისი ბუნდოვანი ურთიერთობით ძმასთან, რომელიც გამუდმებით ცდილობს მის დაცვას წარსულისგან.

ბილი მაქსის ძმაა, ის 17 წლის დაკუნთული და საშიში ბიჭია. იმდენად საშიშიც კი, რომ სკოლაში მის გარშემო ჭორები დადის, თითქოს წარსულში მან ვიღაც მოკლა. ბილის მექალთანის იმიჯი აქვს, უყვარს ალკოჰოლი და აზარტული თამაშები, თუმცა მისი ეს ხასიათი ეხმარება მას, რომ დამალოს თუ ვინ არის სინამდვილეში.

ჯერ-ჯერობით გაურკვეველი და უცნობია მესამე პერსონაჟის რომანის როგორც ბედი, ასევე სქესი. ერთადერთი რაც ვიცით, არის ის, რომ მისი ასაკი 30-დან 38 წლამდე მერყეობს და გაიზარდა ნარკოდამოკიდებულ დედასთან. წარსულში მომხდარი დიდი უბედურება კი მას დიდი შურისძიებისკენ უბიძგებს.

კითხვაზე, ვიხილავთ თუ არა სერიალის ახალ სეზონში ისეთ ტიტულოვან მსახიობებს, როგორიც მაგალითად ვაინონა რაიდერი იყო, ძმები პასუხობენ რომ დიდი შანსია Stranger Things-ის მეორე ნაწილში ბევრი ისეთი სახე გამოჩნდეს, რომელიც ყველას ძალიან კარგად გვეცნობა.

როგორც შოუს შემქმნელებს სჩვევიათ, გაუმხელელი დარჩა მთავარი ინტრიგაც და ამ დრომდე არაფერი ვიცით ილევენის, იგივე ელის შესახებ. თუმცა მინიშნებები კეთდება იმაზე, რომ მონსტრთან შეხვედრამ ის საკმაოდ შეცვალა. შეიცვალა უილის პერსონაჟიც, რომელიც “მეორე მხარეს” აღმოჩნდა. "მეორე მხარეს უილმა მთელი კვირა გაატარა და ამან, რა თქმა უნდა, იმოქმედა მასზე - როგორც ემოციურად, ისე ფიზიკურად. ჩვენ გვგონია, რომ ის გამოიქცა ამ საშინელი ადგილიდან, მაგრამ არის კი ეს ასე?” - ამბობს რეჟისორი.