რუსეთში ახალი სამაგიდო თამაში სახელწოდებით "ჩვენები სოლსბერიში" გამოვიდა. თამაშის სიუჟეტი 4 მარტს ინგლისის ქალაქ სოლსბერიში, ყოფილი რუსი ჯაშუშის სერგეი სკრიპალისა და მისი ქალიშვილის იულიას მოწამვლის ფაქტს ეფუძნება. ინფორმაციას ამის შესახებ რუსული გამოცემა დოჟდი ავრცელებს.

თამაშის რუკა მთავარი ბრალდებულების, რუსეთის სამხედრო დაზვერვის თანამშრომლების სერგეი მიშკინისა და ანატოლი ჩეპიგას გადაადგილების მარშრუტს იმეორებს. თამაშში გასამარჯვებლად მოთამაშე ზუსტად იმავე თანმიმდევრულობით უნდა მოხვდეს იმ ევროპულ ქალაქებში, სადაც მიშკინი და ჩეპიგა იმყოფებოდნენ. დანიშნულების საბოლოო ადგილი კი, ქალაქ სოლსბერის პარკია სადაც მოწამლული სკრიპალები გამვლელებმა აღმოაჩინეს.

სამაგიდო თამაშის ფასი ამ დროისთის დაახლოებით 80 რუბლი (3 ლარზე ცოტა მეტი), მისი შეძენა შესაძლებელია ონლაინ გადამყიდველებისგანაც.

ბრიტანელი სამართალდამცავების ცნობით, სკრიპალები 2018 წლის, 4 მარტს სოლსბერიში, რუსეთის სამხედრო დაზვერვის ორმა თანამშრომელმა, რუსეთში დამზადებული ნერვულ-პარალეპტიკური გაზით "ნოვიჩოკით" მოწამლეს. ყოფილი რუსი ჯაშუშის მოწამვლა დიდი პოლიტიკური სკანდალის მიზეზი გახდა. ერთი თვის შუალედში მსოფლიოს 20-ზე მეტი სახელმწიფოდან 100-ზე მეტი რუსი დიპლომატი გააძევეს.

დაახლოებით ორთვიანი მკურნალობის კურსის შემდეგ ბრიტანელმა მედიკოსებმა შეძლეს სერგეი და იულია სკრიპალის გადარჩენა. ამ დროისთვის მათი ადგილმდებარეობა გასაიდუმლოებულია.