12 დღეა ოკუპირებული ტერიტორიების დე ფაქტო ხელისუფლებების გადაწყვეტილებით, ე.წ. გამშვები პუნქტები ჩაკეტილია. შერიგებისა და სამოქალაქო თანასწორობის საკითხებში სახელმწიფო მინისტრი, ქეთევან ციხელაშვილი აცხადებს, რომ არარსებულ ეპიდემიაზე აპელირებით ე.წ. გადასასვლელი პუნქტების ჩაკეტვას გამართლება არ აქვს.

აფხაზეთის დე ფაქტო ხელისუფლებამ H1N1, იგივე ღორის გრიპის ვირუსის გამო ე.წ. გამშვები პუნქტები 11 იანვარს ორი თვით ჩაკეტა. ამავე მიზეზით პუნქტები დროებით ჩაკეტა სამხრეთ ოსეთის დე ფაქტო ხელისუფლებამაც. როდის აღდგება თავისუფალი მიმოსვლა ჯერჯერობით უცნობია.

სახელმწიფო მინისტრმა მსგავს ქმედებებს არაჰუმანური და მიუღებელი უწოდა. ციხელაშვილის განმარტებით, მოსახლეობა სრულ იზოლაციაშია და განსაკუთრებულად მძიმე მდგომარეობაშია ცხინვალის რეგიონი, რადგან დიდთოვლობის გამო ტრანსკავკასიური მაგისტრალი ჩაკეტილია.

"მოსახლეობას არ აქვს წვდომა ელემენტარულ, სასიცოცხლოდ მნიშვნელოვან პროდუქტებზე, მათ შორის საკვებზე. მოცემულობა არის რთული და არასტანდარტული. სტუდენტებს ხელოვნურად აქვთ შეზღუდული წვდომა განათლებაზე ისევე, როგორც მოსახლეობის სხვა ნაწილს აქვს შეზღუდული წვდომა ვაჭრობაზე, რაც მათი ოჯახებისა და დანარჩენი მოსახლეობისათვის ძალიან მნიშვნელოვანია", — აღნიშნა სახელმწიფო მინისტრმა.