შინაგან საქმეთა სამინისტროს ინფორმაციით, ბათუმში ყაჩაღობის სამ საქმეზე ერთი პირი დააკავეს. უწყების განცხადებით, 22 წლის ბრალდებულმა ცივი იარაღის მუქარით მაღაზიები დააყაჩაღა, საიდანაც 1 729 ლარი და სიგარეტები გაიტაცა.

შსს-ში ამბობენ, რომ დაკავებულმა ბათუმში მდებარე ერთ-ერთი სუპერმარკეტიდან, დანის მუქარით, მოლარეს 900 ლარი გასტაცა და შემთხვევის ადგილიდან მიიმალა. მათი თქმით, იმავე დღეს ბრალდებულმა ბათუმში კიდევ 2 სუპერმარკეტი დააყაჩაღა, საიდანაც კიდევ 829 ლარი და სიგარეტები გაიტაცა.

გამოძიება ყაჩაღობის საქმეზე, საქართველოს სსკ-ს 179-ე მუხლის 1-ლი ნაწილით მიმდინარეობს. დანაშაული 5-დან 7 წლამდე ვადით თავისუფლების აღკვეთას ითვალისწინებს.