ამერიკის შეერთებული შტატების სახელმწიფო დეპარტამენტი აცხადებს, რომ ჩეჩნეთში ლგბტ თემის წევრებზე დევნის განახლებით შეშფოთებული არიან. დეპარტამენტში ადგილობრივ წყაროებზე დაყრდნობით ამბობენ, რომ დეკემბრის შემდეგ ჩეჩნეთში 40 ლგბტ პირი უკანონოდ დააკავეს. მათგან 2 საპყრობილეში წამებით გარდაიცვალა.

დეპარტამენტი მოუწოდებს რუსეთს შეასრულოს საერთაშორისო ხელშეკულებებით ნაკისრი ვალდებულებები, საკუთარი კონსტიტუცია და დაუყოვნებლივ დაიწყოს ამ საქმის გამოძიება. ისინი ასევე მოუწოდებენ რუსეთის ფედერაციას, დაიცვას ჩეჩნეთში უფლებადამცველთა უფლებებ და დაუყოვნებლივ გაათავისუფლოს დაკავებული პირები.

ჩეჩნეთის რესპუბლიკის ხელისუფლება ბრალდებებს ტყუილსა და დეზინფორმაციას უწოდებს. ისინი ამტკიცებენ, რომ უკანონო საპატიმროები არ აქვთ. მათივე თქმით, ამ პერიოდის განმავლობაში სექსუალური ორიენტაციის ნიშნით არავინ დაუკავებიათ.

ჩეჩნეთში ლგბტ პირების მასობრივი დაკავებისა და წამების ფაქტებზე ნოვაია გაზეტამ პირველად 2017 წლის აპრილში დაწერა. წყაროებზე დაყრდნობით გამოცემა ამბობდა, რომ რესპუბლიკის ხელისუფლება გეი კაცებს საიდუმლო ციხეებში სვამდა, რა დროსაც რამდენიმე ადამიანი გარდაიცვალა. რუსეთის ლგბტ ქსელის ინფორმაციით, 2017 წელს ორგანიზაცია ჩეჩნეთის დატოვებაში 150-მდე ადამიანს დაეხმარა, მათგან 130-მა კი რუსეთიც დატოვა.

ხელისუფლება რესპუბლიკაში საიდუმლო ციხეების არსებობას მაშინაც უარყოფდა. ჩეჩნეთის ლიდერი რამზან კადიროვი მედიას, რომელიც გეების შევიწროებაზე წერდა, თვითრეკლამაში ადანაშაულებდა.

2017 წლის დეკემბერში ადამიანის უფლებების დარღვევისთვის რამზან კადიროვი და პოლიციის განყოფილების უფროსი, რომელსაც გეების წამებაში ადანაშაულებენ, მაგნიტსკის სიაში შეიყვანეს.

ევროპის საბჭოს საპარლამენტო ასამბლეამ 2018 წლის ივნისში მიიღო რეზოლუცია, რომლითაც რუსეთს ლგბტ პირების დევნის საკითხის გამოძიებისკენ მოუწოდა ან ამის უფლება საერთაშორისო ორგანიზაციისთვის მიეცა.

გარდა ამისა, ჩეჩნეთში ადამიანის უფლებების დარღვევის შესახებ ეუთომ დეკემბერში ანგარიში წარადგინა. დოკუმენტში ნათქვამია, რომ რესპუბლიკაში ლგბტ პირების დევნა აშკარაა.