18 იანვარს, გერმანიის ბუნდესტაგში გამართულ კენჭისყრაზე დაამტკიცეს კანონპროექტი საქართველოსა და მაღრიბის (ტუნისი, მაროკო და ალჟირი) ქვეყნების უსაფრთხო წარმოშობის ქვეყნებად აღიარების შესახებ. კანონპროექტს 509 დეპუტატმა დაუჭირა მხარი 138-ის წინააღმდეგ.

საქართველოს საგარეო საქმეთა სამინისტროს ცნობით, აღნიშნული კანონპროექტის ძალაში შესვლისათვის აუცილებელია ბუნდესრატის (ფედერალური საბჭოს) თანხმობა. შესაბამისად, კანონპროექტი შემდგომი პროცედურისთვის გადაეგზავნება ბუნდესრატს, რომლის სხდომები თვეში ერთხელ იმართება. თუ ფედერალური საბჭო მხარს დაუჭერს საქართველოსთვის უსაფრთხო ქვეყნის სტატუსის მინიჭების კანონპროექტს, გერმანია საქართველოს მოქალაქეებს თავშესაფარს აღარ მისცემს.

რომელ მომდევნო სხდომაზე იმსჯელებს ბუნდესრატი აღნიშნულ კანონპროექტზე, ჯერ ცნობილი არ არის. კენჭისყრამდე დაგეგმილია ბუნდესრატში პარტიებს შორის შემდგომი კონსულტაციები კანონპროექტზე მხარდაჭერის მოპოვების მიზნით.