აფეთქების შედეგად დაზარალებული კომპანიის ადვოკატი, ალექსანდრე კობაიძე აცხადებს, რომ ყაზტრანგაზ-თბილისმა პროფესიული გულგრილობა გამოიჩინა. მისი აზრით, კომპანიამ პასუხისმგებლობა უნდა აიღოს და ჯოხი კომპანიაზე არ უნდა გადატეხონ, "რისი ტენდენციებიც იგრძნობა".

"დაუყოვნებლივ მიეცეს პასუხისმგებლობაში ყაზტრანგაზი, როგორც ამ დანაშაულის ჩამდენი. აქ განხორციელდა დანაშაული, რომელსაც საზარელი შედეგები მოჰყვა", — განაცხადა ადვოკატმა ბრიფინგზე.

მან განმარტა, რომ დამკვეთი ქირაობს კომპანია ყაზტრანგაზს, რომელიც შეიმუშავებს პროექტს და შემდგომ ამონტაჟებს გაზის გაყვანილობას.

"უსაფრთხოებაზე პასუხისმგებლობა ყაზტრანგაზს აქვს აღებული, რაც ხელშეკრულებაშიცაა გაწერილი. ამ შემთხვევაში ყაზტრანგაზი ორჯერ გამოიძახეს. მათ მოსახლეობის მიმართ ცინიკური დამოკიდებულება ჰქონდათ. თქვეს, რომ აქ არაფერი არ ხდება. როცა ეუბნებოდნენ, რომ კარგად შეამოწმე და უთხრეს, რომ ლიფტი მეცხრემდე ვერ ადის, დაეზარათ, რომ მეცხრეზე ასულიყვნენ და შეემოწმებინათ, რა ხდებოდა. ეს გულგრილობაა და მეტი არაფერი, ამაზე კომპანიამ პასუხისმგებლობა უნდა აიღოს", — აცხადებს ადვოკატი.

16 იანვარს, საღამოს თბილისში, დიდ დიღომში, ავთანდილის ქუჩაზე საცხოვრებელი კორპუსის მეექვსე სართული, სავარაუდოდ, გაზის გაჟონვის შედეგად აფეთქდა. შემთხვევის შედეგად გარდაიცვალა ოთხი ადამიანი, მათ შორის 4 წლის ბავშვია. სხვადასხვა სახის დაზიანება მიიღო რვა ადამიანმა.