სახელმწიფო უსაფრთხოების სამსახურში საკადრო ცვლილებები განხორციელდა. სუს-ის რეგიონული სამსახურის უფროსებს დაკავებული თანამდებობები დაატოვებინეს. ამის შესახებ ინფორმაცია On.ge-ს უწყებაში დაუდასტურეს. საკადრო ცვლილებების შესახებ ინფორმაცია თავდაპირველად რუსთავი 2-მა გაავრცელა.

რუსთავი 2-ის ცნობით, საკადრო გადაადგილებები სხვა თანამშრომლებსაც ეხებათ. ერთ-ერთ პირველი ვისაც თანამდებობა დაატოვებინეს აჭარის სუს-ის უფროსი ირაკლი ერისთავი იყო. ტელეკომპანიის ცნობით, თანამდებობებიდან სუს-ის უფროსის ყოფილი მოადგილის, სოსო გოგაშვილის გარემოცვასთან დაკავშირებულ პირებს ათავისუფლებენ.

რუსთავი 2 ასევე აცხადებს, რომ სახელმწიფო უსაფრთხოების სამსახურის უფროსის მოადგილედ, შინაგან საქმეთა სამინსიტროს გენერალური ინსპექციის მოქმედი უფროსი ალექსანდრე ხოჯევანიშვილი ინიშნება. On.ge-ს სახელმწიფო უსაფრთხოების სამსახურში განუცხადეს, რომ ეს პიროვნება სახელმწიფო უსაფრთხოების სამსახურში დანიშნული არ არის და შესაბამისი ბრძანების შემთხვევაში საზოგადოებას ეცნობება.