Fast Company, კორეულ Yonhap News Service-ზე დაყრდნობით ავრცელებს ინფორმაციას, რომ Samsung აპირებს მოახდინოს მისი უახლესი ფლაგმანი ტელეფონის - Galaxy Note 7-ის სრული გამოთხოვა მომხმარებლებისგან. ამის მიზეზად ტელეფონის აფეთქების შემთხვევები სახელდება. ინტერნეტში მინიმუმ ორმა მომხმარებელმა განათავსა ფოტოები, სადაც მთლიანად დამწვარი სმარტფონი ჩანს. მათი თქმით, მოწყობილობის ელემენტი დატენვისას აფეთქდა.

"ყველაზე მნიშვნელოვანი, ჩვენი მომხმარებლების უსაფრთხოებაა და ჩვენ არ გვსურს გავუცრუოთ იმედები ჩვენს ერთგულ კლიენტებს", განაცხადა სამსუნგის წარმომადგენელმა. მისი თქმით, კომპანია შიდა გამოძიების შედეგებს და "საფუძვლიან სამოქმედო გეგმას" მიმდინარე კვირის ბოლოს ან მომავალი კვირის დასაწყისში გამოაცხადებს.

Korea Herald-მა ოთხშაბათს გაავრცელა ინფორმაცია, რომ სამსუნგი ახალ სმარტფონზე შეკვეთების მიღებას დროებით აჩერებდა. ამ მოდელს, რომელიც 19 აგვისტოს წარდგენის შემდეგ სწრაფად იყიდებოდა, ელემენტის სწრაფად დატენვის ახალი ტექნოლოგია აქვს. სავარაუდოდ, გამოძიების დასრულების შემდეგ გახდება ცნობილი, თუ რამდენადაა კავშირში ეს ფუნქცია აფეთქებების შესახებ გავრცელებულ ცნობებთან.