თბილისის მერიასთან მიმდინარე პარტიზანი მებაღეების აქციის პარალელურად, მერმა დავით ნარმანიამ ჟურნალისტებთან კომენტარი გააკეთა, რომ იგი არ გამორიცხავს საკადრო გადაადგილებებს, თუკი საკრებულო რეორგანიზაციის პროექტს დაამტკიცებს:

"ორგანიზაცია უპირველეს ყოვლისა გულისხმობს მოქნილი სტრუქტურის ფორმირებას და მეორეს მხრივ რასაკვირველია გარკვეული საკადრო გადაადგილებებიც გამორიცხული არ იქნება ოღონდ მას შემდეგ, რაც დედაქალაქის საკრებულო დაამტკიცებს რეორგანიზაციის თაობაზე პროექტს და მოქმედი კანონმდებლობის შესაბამისად, ეს აუცილებელიც იქნება".

მერიის შენობის წინ გაშლილ კარვებში, 24 საათის განმავლობაში მორიგეობენ პარტიზანი მებაღეების წარმომადგენლები. ისინი ხელმოწერებს აგროვებენ გამწვანების და ეკოლოგიის საქალაქო სამსახურის ხელმძღვანელი პირების გათავისუფლების მოთხოვნით.

2 სექტემბერს, 18:00 საათზე, არასამთავრობო ორგანიზაციები მერიასთან მასშტაბურ აქციას გეგმავენ, თბილისის ეკილოგიისა და გამწვანების საქალაქო სამსახურის რეორგანიზაციისა და სამსახურის უფროსის და მისი მოადგილის გადადგომის მოთხოვნით.