"არ ვიცნობ დეკანოზ გიორგი მამალაძეს. არც ის ვიცი, რამდენად დამნაშავეა ან უდანაშაულო. მე მხოლოდ ის ვიცი, რომ საპყრობილეში მისი ყოფნა, მითუმეტეს "მკვლელობის მცდელობის" ბრალდებით, დამნაშავეა თუ უდანაშაულო, ჩვენი სირცხვილია მთლიანობაში", — ამის შესახებ დმანისი-ტაშირის, დიდი ბრიტანეთისა და ირლანდიის მთავარეპისკოპოსი, მეუფე ზენონი ფეისბუკის გვერდზე წერს.

მთავარეპისკოპოსი ე.წ. ციანიდის საქმეზე მსჯავრდებულ დეკანოზ მამალაძის შეწყალებაზეც საუბრობს და ამბობს, რომ ეკლესიაში და ზოგადად საზოგადოებაშიც, ეს ხელს შეუწყობს "ღვთივსულიერი მშვიდობის განმტკიცებას".

"თავს ვერ დავაღწევთ იმას, რომ ე.წ ციანიდის საქმე თანამედროვე ეკლესიის წევრთათვის, ქვეყნისთვის წარმოადგენს შავ ლაქას", — წერს სასულიერო პირი და აღნიშნავს იმასაც, რომ ამ საქმემ ბევრს გაუჩინა უსამართლობისა და უნდობლობის განცდა.

მთავარეპისკოპისი მიიჩნევს, რომ დიდი წინაღობა და მუხრუჭია ქვეყნისა და საზოგადოების წინსვლისათვის შერჩევითი სამართალი:

"ჩვენთვის დამახასიათებელი უკიდურესობის გარემოებით ზოგიერთისთვის დეკ. გიორგი მამალაძე "სიმართლისათვის დევნილია" და ზოგიერთისათვის "ცოდვილთა შორის ცოდვილი". რა მოიტანა ამ ყოველივემ: ლანძღვა-გინება, განკითხვა, სიძულვილის და გაუცხოების ტენდენცია. ამბავი გასცდა ჩვენი ქვეყნის საზღვრებს და ალაპარაკდნენ სხვაგან. ზოგჯერ ვირჩევთ უმცირესს და ვკარგავთ უმთავრესს. ვფიქრობ, ე.წ ციანიდის საქმესთან დაკავშირებული ყოველი სუბიექტი, აგრეთვე ყოველი ჩვენგანი გავაანალიზებთ თავსდატეხილ განსაცდელს, რადგან მეტ-ნაკლებად პასუხისმგებელი ვართ ყველა ერთად".

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.

გაიგეთ მეტი: ციანიდის საქმე - მოკლედ