თბილისის, 71-ე საბავშვო ბაღში საახალწლო ზეიმის დროს პიროტექნიკა გამოიყენეს. როგორც ფესბუქზე გავრცელებულ ვიდეოში ჩანს, პიროტექნიკა ფეთქდება და სხვადასხვა მიმართულებით ცეცხლის ალს ისვრის, რასაც ადგილზე მყოფი ბავშვების პანიკა და მშობლების ყვირილი მოსდევს.

ზეიმზე მყოფი ერთ-ერთი ბავშვის ნათესავმა On.ge-ს განუცხადა, რომ გამყიდველმა მშობლებს შენობაში გამოსაყენებელი შუშხუნების ნაცვლად, შეცდომით სხვა სახის პიროტექნიკა მიყიდა. სოციალურ ქსელში ვიდეოს კომენტარებში წერენ იმის შესახებ, რომ რამდენიმე ბავშვმა დამწვრობა მიიღო და სასწრაფო სამედიცინო დახმარება გამოიძახეს, თუმცა სასწრაფოს პრესსამსახური ინფორმაციას არ ადასტურებს.

როგორც On.ge-ს შინაგან საქმეთა სამინისტროში განუცხადეს, სავარაუდოდ, პიროტექნიკის გამოყენების შედეგად საბავშვო ბაღის ერთ-ერთმა აღსაზრდელმა მსუბუქი დაზიანება მიიღო, მას საავადმყოფოში გაეწია დახმარება და ამჟამად მკურნალობას სახლში განაგრძობს. მომხდართან დაკავშრებით On.ge-მ ცდილობს ბაღების გაერთიანების დირექტორის ჩაწერას, თუმცა ის ჩვენს ზარებს არ პასუხობს.

საქმეზე გამოძიება სისხლის სამართლის კოდექსის 124-ე მუხლით დაიწყო, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.

2018 წლის იანვარში თბილისში პიროტექნიკით გამოწვეული ტრავმული დაზიანებებით ჰოსპიტალიზებული იყო 44 ადამიანი, მათ შორის 24 არასრულწლოვანი. 2017 წელის დასაწყისშიც პიროტექნიკის გამოყენების შედეგად 54 ადამიანი დაშავდა.