ხორავას ქუჩაზე მოკლულის მამა ზაზა სარალიძე არ ეთანხმება შს მინისტრს, რომ არ არის მიხეილ კალანდიას სამართლებრივი დევნის საფუძველი არ არის. მისი თქმით, კეთილი ნებაა საჭირო, რომ მიხეილ კალანდიას მიმართ სამართალი სწორად წარიმართოს.

როგორც ზაზა სარალიძემ აღნიშნა, დღეს მინისტრმა ისაუბრა სამოხელეო ნაწილზე, რასაც ამდენი ხნის განმავლობაში თავად ითხოვდა.

"რაც შეეხება სამოხელეო ნაწილს, მართლაც სიახლეა, აქამდეც ანალოგიურს ვითხოვდი. უცნაური აქ არაფერი ყოფილა. როგორც ჩანს, ახლა მიხვდნენ და გამოძიება უნდა დაიწყონ ამ პირებზე, რაც ჩემი აზრით, საფუძველი იქნება ამ საქმის ბოლომდე მიყვანის, მაგრამ ფაქტი ფაქტად რჩება, ჩემი შვილის მკვლელი გარეთ არის და ამ ნაწილში ვერ დავეთანხმები", — განაცხადა ზაზა სარალიძემ.

მისივე თქმით, პროკურატურა და შს მინისტრი რაღაცაზე არიან შეთანხმებული, ამიტომ აპირებს, გააგრძელოს ბრძოლა, ვიდრე ჭეშმარიტება არ აღდგება.

"კომისიამ გამოააშკარავა ყველაფერი, რაზედაც რეაგირება, თავადაც აღნიშნა უკვე მინისტრმა, სააპელაციო სასამართლოს შემდეგ დაიწყება. ეტაპობრივად ყველაფერი გამოაშკარავდა", — განაცხადა ზაზა სარალიძემ.

შს მინისტრმა გიორგი გახარიამ პარლამენტში სიტყვით გამოსვლისას ხორავას ქუჩის საქმის მოწმის, მიხეილ კალანდიას ეპიზოდზე თქვა, რომ მიმდინარეობს ამ პირის "ფუნქციის დეტალური შესწავლა" თუმცა მის მიმართ დევნის დასაწყებად "შესაბამისი სტანდარტი არ არსებობს".