შს მინისტრმა გიორგი გახარიამ პარლამენტში სიტყვით გამოსვლისას ხორავას ქუჩის საქმის მოწმის, მიხეილ კალანდიას ეპიზოდზე თქვა, რომ მიმდინარეობს ამ პირის "ფუნქციის დეტალური შესწავლა" თუმცა მის მიმართ დევნის დასაწყებად "შესაბამისი სტანდარტი არ არსებობს".

გიორგი გახარიამ ევროპულ საქართველოს მიმართა და თქვა, რომ საგამოძიებო კომისიის მუშაობისას, კალანდიას ნაწილში, მათ აირჩიეს "სახალხო მართლმსაჯულების პრინციპი".

"თქვენ აირჩიეთ და ჩათვალეთ, რომ ეს იქნებოდა ყველაზე მოსაწონი და ხმამაღალი განაცხადი, რაც გააკეთეთ. თქვენ დისკრედიტაცია მოახდინეათ იმ ინსტიტუტის, რასაც ჰქვია საპარლამენტო კომისია", — განაცხადა გიორგი გახარიამ.

ხორავას ქუჩაზე მომხდარი მკვლელობიდან 1 წელი გავიდა. ამ დრომდე დაუდგენელია თუ ვინ მოკლა არასრულწლოვანი დავით სარალიძე. შვილმოკლული მამა მთელი წელია მკვლელების დასჯას და სამართლიანი გამოძიების წარმოებას ითხოვს.

2 ივლისს პარლამენტის დროებითმა საგამოძიებო კომისიამ ხორავას საქმის მოწმეებთან, გამომძიებლებთან, პროკურორთან და დაზარალებულთა ოჯახებთან გასაუბრების შემდეგ გადაწყვეტილება მიიღო და რეკომენდაციებს კენჭი უყარა. კომისიის გადაწყვეტილებით, შინაგან საქმეთა სამინისტროს ორი რეკომენდაციით მიმართეს:

  • დაუყოვნებლივ დაიწყოს გამოძიება გ.მ-ს ცივი იარაღით დაჭრის საქმეზე, ასევე შსს-მ გაატაროს შესაბამისი ოპერატიული და სამძებრო ღონისძიებები დანაშაულის ჩამდენი პირების იდენტიფიცირებისათვის (10 მომხრე და 1 წინააღმდეგი);
  • დაიწყოს სისხლისსამართლებრივი დევნა მ.კ-ს [კალანდია] მიმართ, დავით სარალიძის ჯგუფურად მკვლელობაში თანამონაწილეობის საქმეზე; (8 მომხრე და 6 წინააღმდეგი).

გაიგეთ მეტი: 1 წელი ხორავას ქუჩის ტრაგედიიდან — მოკლედ