მარნეულის მუნიციპალიტეტში, სოფელ სადახლოში, 180-ზე მეტი ადამიანი გუშინ გვიან ღამით მოიწამლა. ყველა მათგანი ქორწილში იმყოფებოდა. ინფორმაციას რუსთავი 2 ავრცელებს.

ექიმების და მუნიციპალიტეტის გამგებლის თქმით, ყველა მათგანის ინტოქსიკაციის სავარაუდო მიზეზი საკვები ან სასმელია.

მოწამლულები მარნეულის საავადმყოფოში გვიან ღამით მიიყვანეს და მოათავსეს. მათ შორის არიან ბავშვებიც. ყველა მათგანის მდგომარეობა სტაბილურია.

ადგილობრივი ექიმის თქმით, 40 მოწამლული საავადმყოფოს მანქანით რუსთავსა და თბილისში გადმოიყვანეს:

"ყველა პაციენტს ერთი და იგივე სიმპტომი აღენიშნებოდა, ღებინება და მუცლის არეში ტკივილი".

მოწამვლის მიზეზები დგინდება, ფაქტზე დაწყებულია გამოძიება. ქვემო ქართლის გუბერნატორის, პაატა ხიზანიშვილის თქმით, მოწამვლის მიზეზი შესაძლოა კუსტარულად დამზადებული სასმელი იყოს.