პრეზიდენტის საპარლამენტო მდივნის, დიმიტრი გაბუნიას განცხადებით, ქალთა მოძრაობა მისი მისამართით ცრუ ბრალდებებს ავრცელებს. ის ამბობს, რომ ადვოკატის კლიენტთან გაიგივება არ შეიძლება და "ამ თემაზე ინსინუაციები უნდა დასრულდეს".

დიმიტრი გაბუნია ზვიად დევდარიანის ადვოკატი იყო, რომელიც ქალთა მოძრაობამ სექსუალურ შევიწროებაში დაადანაშაულა. მოგვიანებით, დევდარიანის მხრიდან სექსუალური შევიწროების შემთხვევები დაადგინა სახალხო დამცველმაც.

დიმიტრი გაბუნიამ განმარტა, რომ ის იცავდა ერთ კონკრეტულ პირს, და ეს არ შეიძლება გაიგივდეს მისი პოზიციის გაზიარებასთან. თუმცა გაბუნიამ ზვიად დევდარიანის პრესკონფერენციაზე თქვა: "რას აკეთებდა რო ისეთს, რომელსაც ნებისმიერი ჩვენგანი არ აკეთებს?.."

"აქვე ვიტყვი, დაანებონ თავი ორმაგი სტანდარტებით განცხადებების კეთებას. არჩევნების მეორე ტურის განმავლობაში ეს ხალხი არც თუ ისე სასიამოვნო ტერმინებით ამკობდა ქალბატონ სალომე ზურაბიშვილს. მე ამ თემაზე მეტ კომენტარს არ გავაკეთებ. არასერიოზული, არაკომპეტენტური, არაკვალიფიციური და სასაცილოა ამ მოძრაობის მიერ გაკეთებული განცხადებები. მე მათ ვურჩევდი გაიარონ იურიდიული კონსულტაციები და ცრუ ბრალდებებს მოეშვან. დასაშვები კრიტიკის ზღვარი, სადაც იქნება გადაცილებული, ისინი მიიღებენ სამართლებრივ პასუხს", — განაცხადა დიმიტრი გაბუნიამ.

ქალთა მოძრაობა დიმიტრი გაბუნიას საპარლამენტო მდივნის პოზიციაზე დანიშვნის გასაპროტესტებლად შაბათს აქციას გამართავს. ქალთა მოძრაობამ რამდენიმე არასამთავრობო ორგანიზაციასთან ერთად გაბუნიას საკითხზე განცხადება ჯერ კიდევ მაშინ გაავრცელა, როცა მისი დანიშვნის შესახებ ინფორმაცია დადასტურებული არ იყო. ქალები მოუწოდებდნენ პრეზიდენტს არ დაენიშნა გაბუნია საპარლამენტო მდივნად.

საქართველოს მეხუთე პრეზიდენტმა, სალომე ზურაბიშვილმა პირველ სამუშაო დღეს ადმინისტრაციის ხელმძღვანელი და საპარლამენტო მდივანი წარადგინა. დიმიტრი გაბუნია, რომელიც საპარლამენტო მდივნის პოზიციას იკავებს არაერთ გახმაურებული საქმეში მონაწილეობდა ადვოკატის სტატუსით. ის იყო ქალთა მიერ სექსუალურ შევიწროებაში დადანაშაულებული ზვიად დევდარიანის ადვოკატიც