გაერთიანებული ოპოზიციის ერთ-ერთმა წევრმა, მსოფლიო ბანმა, პაატა ბურჭულაძე სანკტ-პეტერბურგის ფილარმონიაში გამართულ კონცერტზე გამოსვლის მიზეზს განმარტავს. რუსეთში დირიჟორის, იური ტემირკანოვის საიუბილეო გალა-კონცერტს ვლადიმერ პუტინიც ესწრებოდა.

ბურჭულაძის პუტინის წინაშე გამოსვლას საქართველოში არაერთგვაროვანი შეფასება მოჰყვა. მსოფლიო ბანი კი განმარტავს, რომ გალა-კონცერტში მონაწილეობა იური ტემირკანოვის მიწვევით მიიღო და კიდევ არაერთხელ ჩავა იქ, მსგავს შემთხვევაში.

პაატა ბურჭულაძის განმარტებას ტელეკომპანია რუსთავი 2 ავრცელებს:

"იური ტემირკანოვის 80 წლის იუბილესადმი მიძღვნილ გალა-კონცერტში ვიღებდი მონაწილეობას მისივე პატივსაცემად და მისივე მიწვევით. აუცილებლად ჩავალ და მივულოცავ დიდ მაესტროს ყველა მომდევნო იუბილესაც. მთელი ცხოვრება მემახსოვრება და მადლიერი ვიქნები მისი მხარდაჭერის. ომის შემდეგ, როდესაც ბევრი ჩემი კოლეგა თავს იკავებდა საქართველოში ჩამოსვლისგან, იური ტემირკანოვი 2013-ში მთელი თავისი ორკესტრით ჩამოვიდა თბილისში და საქველმოქმედო კონცერტი გამართა ქართველი ბავშვების დასახმარებლად. 2008 წელსაც იყო ჩამოსული ჩემს იუბილეზე... იური ტემირკანოვის იუბილეზე მომავალშიც აუცილებლად ჩავალ და თავს დავუკრავ ყველა დიდ ხელოვანს, მით უფრო, ვისაც ასეთი სიკეთე და მეგობრობა აკავშირებს საქართველოსთან. მთელი ჩემი ცხოვრება, როგორც შემეძლო, ვემსახურე ჩემს ქვეყანას და იმ თითოეულ ქართველს, ვისაც ჩემი თანადგომა სჭირდებოდა. ბევრი სითბო და სიყვარულიც მიმიღია, რისთვისაც ყოველთვის მადლიერი ვიქნები და ვისაც არ მოვწონვარ ან არ მოსწონს ჩემი ცხოვრების წესი, ვუსურვებ, თავად შექმნან უკეთესი და საერთოდ, ჩემს წინააღმდეგ კამპანიების აგორებაში დახარჯული ფული, დრო და ძალისხმევა სჯობს, ქვეყნის გადარჩენისკენ მიმართოთ, რომელიც თავზე გვენგრევა".

სანკტ-პეტერბურგში გამართული კონცერტის დაწყების წინ მომღერალმა თავი დაუკრა იმ ტრიბუნას, სადაც ტემირკანოვი პუტინთან ერთად იჯდა. ბურჭულაძემ ოკუპანტი ქვეყნის პრეზიდენტსა და დამსწრე საზოგადოებას ზაქარია ფალიაშვილის დაისიდან არია "ღვინოვ კახურო" უმღერა. ღონისძიება რუსულმა სახელისუფლებო მედიამ გააშუქა.

ქართველი პოლიტიკოსის ამ კონცერტზე გამოჩენას საზოგადოების პროტესტი მოყვა. მომხდარი ჟურნალისებთან შეაფასა გაერთიანებული ოპოზიციის ლიდერმა გიორგი ვაშაძემ. მისი თქმით, ეს ფაქტი მიუღებელია და ბურჭულაძისგან განმარტებას ითხოვს.

ეს არ არის პირველი შემთხვევა, როცა ბურჭულაძე მოსოვში კონცერტს მართავს. 2017 წელს რუსულ სახელისუფლებო მედიასთან ინტერვიუში ბურჭულაძე საუბრობს იმაზე, რომ ის "რუსული სკოლის წარმომადგენელი რუსული ბანია". მისი თქმით, ამით ყოველთვის ამაყობდა.