ზაზა სარალიძემ შსს-ს შენობიდან გამოსვლისას ჟურნალისტებს უთხრა, რომ დღის წესრიგში დგას კონკრეტული პირების დაკავების საკითხი. სარალიძემ განაცხადა, რომ კრიმინალური პოლიციის ხელმძღვანელისგან, ვლადიმერ ბორცვაძისგან, მიიღო პირობა, რომ ყველა დამნაშავე დაისჯება. ზაზა სარალიძე შსს-ში ადვოკატთან ერთად მივიდა.

"არ ვიცი, რატომ იკავებენ თავს, რა ხდება. მაგრამ რომ ჩავალ ბოლომდე, გადავიკითხავ საქმის მასალებს, უკვე კონკრეტულ კითხვებს დავსვამ. მე არ განვიხილავ მხოლოდ და მხოლოდ კალანდიას საკითხს, მე განვიხილავ ყველა ადამიანის საკითხს, ვინც შემხებლობაში იყო ამ საქმესთან და ნებისმიერი, ის პროკურორი იქნება, თუ გამომძიებელი იქნება, თუ ვინც კი დანაშაული ჩაიდინა ამ საქმის გაყალბებაში, ყველა უნდა იყოს პასუხისგებაში მიცემული".

ხორავას ქუჩაზე მომხდარი მკვლელობიდან 1 წელი გავიდა. ამ დრომდე დაუდგენელია თუ ვინ მოკლა არასრულწლოვანი დავით სარალიძე. შვილმოკლული მამა მთელი წელია მკვლელების დასჯას და სამართლიანი გამოძიების წარმოებას ითხოვს.