საქართველოს პარლამენტის თავმჯდომარის, ირაკლი კობახიძის განცხადებით, საქართველოს მთავარი ეროვნული გამოწვევა რუსეთის ფედერაცია და ოკუპირებული ტერიტორიებია.

ირაკლი კობახიძემ ტალინში, სემინარზე შიდაპოლიტიკური განვითარება და საქართველოს საგარეო პოლიტიკის პრიორიტეტები სიტყვით გამოსვლისას იმ პოლიტიკაზე ისაუბრა, რომელსაც საქართველო რუსეთთან მიმართებაში ახორციელებს.

"რუსეთის ფედერაციასთან ვახორციელებთ პრაგმატულ პოლიტიკას, რასაც ფართოდ უჭერენ მხარს ჩვენი დასავლელი პარტნიორები. ეს პოლიტიკა 2012 წლიდან შევცვალეთ და მოვახერხეთ, მნიშვნელოვნად გაგვეუმჯობესებინა სტაბილურობასა და უსაფრთხოებასთან დაკავშირებული ვითარება ჩვენს ქვეყანაში. ახლა გვაქვს არა მხოლოდ უფრო მაღალი დონე სტაბილურობისა და უსაფრთხოებისა ჩვენს ქვეყანაში, არამედ, წვლილი შეგვაქვს რეგიონის სტაბილურობასა და უსაფრთხოებაში. საქართველო ასრულებს პოზიტიურ როლს რეგიონში", — განაცხადა ირაკლი კობახიძემ.

მისივე თქმით, სჯერა, რომ საქართველო ნატოსა და ევროკავშირის წევრი გახდება. მისივე შეფასებით, რუსეთის ფედერაციასთან გარკვეული წარმატების მიღწევა მოხერხდა:

"თუმცა, რაც შეეხება პოლიტიკურ პროგრესს, ამ მხრივ, უბრალოდ ნულია. არ გვაქვს არანაირი პოლიტიკური პროგრესი და ტენდენცია ნეგატიურია. ოკუპირებულ რეგიონებში ადამიანის უფლებათა ძალიან სერიოზული დარღვევების მოწმე ვართ, ადამიანთა გატაცება და მკვლელობაც კი, რეგულარულად ხდება. საერთაშორისო საზოგადოებამ ამ პრობლემას განსაკუთრებული ყურადღება უნდა მიაქციოს", — განაცხადა კობახიძემ.

მისივე თქმით, პრობლემაა მცოცავი ანექსია. ირაკლი კობახიძემ კიდევ ერთხელ აღნიშნა, რომ "საერთაშორისო საზოგადოებამ რუსეთის ფედერაციის მხრიდან აგრესიის შესაჩერებლად, ხმა უნდა აიმაღლოს".

"2008 წელს, როდესაც საქართველოსა და რუსეთის ფედერაციას შორის ომი მოხდა, ადამიანთა უმრავლესობა, ალბათ, არ ელოდა, იგივე შეიძლებოდა, სხვა ქვეყნებშიც განმეორებულიყო, მაგრამ რამდენიმე წლის შემდეგ, იმავე მოხდა უკრაინაში. ახლა ჩვენ მოწმენი ვართ მოვლენების პრობლემატური განვითარებისა უკრაინაში, აზოვის ზღვაში. ასე რომ, ფრთხილად უნდა ვიყოთ, როდესაც ვსაუბრობთ რუსეთის ფედერაციის შესაძლო აგრესიაზე და იმედი გვაქვს, რომ გვექნება ძლიერი მხარდაჭერა საერთაშორისო საზოგადოების მხრიდან ამ კუთხით", — განაცხადა კობახიძემ.