ლოს ანჯელესის საერთაშორისო აეროპორტში დაახლოებით 2 საათის წინ პანიკამ აეროპორტის მუშაობის შეჩერება და ევაკუაცია გამოიწვია. ადამიანები ტერმინალებიდან გარბოდნენ და სხვებსაც მოუწოდებდნენ გაქცევისკენ. ვრცელდებოდა ხმები, რომ აეროპორტში იყო სროლის ხმა.

აეროპორტის პოლიციამ დეტალურად შეამოწმა აეროპორტი, რის შემდეგაც, მათი განცხადებით, სროლის ფაქტი არ დადასტურდა. პოლიციამ მოსახლეობას ტვიტერის საშუალებით სიმშვიდისკენ მოუწოდა. ტვიტერით გავრცელებულ განცხადებაში წერია, რომ ისინი კვლავ ამოწმებენ აეროპორტს და ატარებენ ყველა ღონისძიება საზოგადოების უსაფრთხოების უზრუნველსაყოფად.

NBC News-ის ინფორმაციით, აეროპორტში პანიკა ჯერჯერობით დაუდგენელმა ხმაურმა გამოიწვია, რაც ადამიანთა ნაწილს სროლა ეგონა, 911-ში აეროპორტის 3 ტერმინალიდან არაერთმა ადამიანმა დარეკა.

ტვიტერის ერთ-ერთმა მომხმარებელმა ასევე გამოაქვეყნა ვიდეო, სადაც აღბეჭდილია აეროპორტში პოლიცია როგორ აკავებს მამაკაცს, რომელსაც ზოროს კოსტუმი აცვია. ვიდეოს აღწერაში წერია, რომ აღნიშნულ პირს პლასტმასის ხმალიც ეკავა ხელში. ჯერჯერობით უცნობია, აქვს თუ არა აღნიშნულ დაკავებას რაიმე კავშირი აეროპორტში გამოწვეულ პანიკასთან.

აეროპორტის გაჩერებამ მის მისასვლელ გზებთან საცობი გამოიწვია.

თვითმფრინავები, რომელიც ლოს ანჯელესის აეროპორტში უნდა დაშვებულიყვნენ, ახლომდებარე აეროპორტებისკენ გადაამისამართეს.