საქართველოს მომავალი პრეზიდენტი სალომე ზურაბიშვილი ამბობს, რომ საჯარო სამსახურის შესახებ კანონში დაგეგმილი ცვლილებები მას არ ეხება. კანონპროექტით, რომელსაც პარლამენტი დაჩქარებული წესით განიხილავს პრეზიდენტის ადმინისტრაციის თანამშრომლებთან ადმინისტრაციული ხელშეკრულებების დადებას გულისხმობს. ეს აძლევს საფუძველს მომავალ პრეზიდენტს გაათავისუფლოს ადმინისტრაციის არსებული შემადგენლობა ახალი კადრები კონკურსის გარეშე აიყვანოს.

კითხვაზე, არის თუ არა ამ ცვლილებაში მისი ინტერესები, სალომე ზურაბიშვილი პასუხობს, რომ პარლამენტი მისგან დამოუკიდებელი ორგანოა.

"ეს კანონმდებლობა მე არ მეხება. მე არ მაქვს მიღებული კანონი. კანონმდებელ ორგანოს ეხება ეს და იქ უნდა მიმართოთ თქვენი კითხვებით. მე ვინ რას აცხადებს, არ ვიცი, მაგრამ კანონმდებელი ორგანო არ არის ჩემთან დაკავშირებული, არის დამოუკიდებელი. პრეზიდენტი სხვა რამე არის, პრეზიდენტის ადმინისტრაცია კიდევ ცალკე და მე არ მაქვს მიღებული არანაირი ჯერ გადაწყვეტილება ამის შესახებ", — განუცხადა ზურაბიშვილმა ჟურნალისტებს.

რა იცვლება საჯარო მოხელის შესახებ კანონში

პარლამენტი დაჩქარებული წესით განიხილავს საჯარო მოხელის შესახებ კანონში ცვლილებებს, რაც საქართველოს ახალ პრეზიდენტს, სალომე ზურაბიშვილს საშუალებას მისცემს გაათავისუფლოს ადმინისტრაციის თანამშრომლები და ახალი კადრები კონკურსის გარეშე დანიშნოს. ქართული ოცნების დეპუტატების, რატი იონათამაშვილისა და გურამ მაჭავარიანის საკანონმდებლო ინიციატივით, პრეზიდენტის ადმინისტრაციის თანამშრომლები ჩაითვლებიან ადმინისტრაციული ხელშეკრულებით დასაქმებულ პირებად და მათზე პროფესიული საჯარო მოხელეების შრომითი გარანტიები აღარ გავრცელდება.

გაიგე მეტი: