საფრანგეთის უმაღლესმა ადმინისტრაციულმა სასამართლომ ქალაქ Villeneuve-Loubet-ის მიერ ბურკინის აკრძალვა გააუქმა. ინფორმაციას BBC ავრცელებს.

სასამართლომ დაადგინა, რომ აკრძალვა "სერიოზულად და აშკარად არალეგალურად არღვევს წასვლისა და მოსვლის, რწმენისა და პიროვნების ფუნდამენტურ თავისუფლებებს". საბოლოო გადაწყვეტილებას აკრძალვის ლეგიტიმურობასთან დაკავშირებით სასამართლო მოგვიანებით მიიღებს.

ადვოკატების თქმით, დაჯარიმებულ ადამიანებს შეეძლებათ ფული უკან მოითხოვონ.

ქალაქ Villeneuve-Loubet-ის გადაწყვეტილებაზე სასამართლოს ყურადღება ადამიანის უფლებათა ჯგუფმა და ანტიისლამოფობიის ორგანიზაციამ გაამახვილეს.

საცურაო კოსტიუმის, რომელიც მთელ ტანს ფარავს, აკრძალვამ საფრანგეთსა და მთელ მსოფლიოში დებატები გამოიწვია.

საზოგადოებრივი აზრის კვლევები აჩვენებდა, რომ ფრანგების უმრავლესობა აკრძალვას ემხრობოდა. ქალაქის მმართველები კი ამბობდნენ, რომ აღნიშნული გადაწყვეტილება საზოგადოებრივ წესრიგსა და სეკულარიზმს იცავდა.

მუსლიმები ბურკინის აკრძალვას უსამართლობად მიიჩნევენ.

24 აგვისტოს გავრცელდა ფოტოები, რომელზეც ასახულია, როგორ ავალდებულებს საფრანგეთის პოლიცია მუსლიმ ქალს სანაპიროზე ბურკინის გახდას. პოლიცია დამსვენებლებმა მას შემდეგ გამოიძახეს, რაც 34 წლის მუსლიმმა ქალმა მათი მოთხოვნის შემდეგ თავსაბურავი არ მოიხსნა.