ტელეკომპანია იმედის ყოფილი თანამშრომელი, თათია სამხარაძე, რომელიც მის ყოფილ ხელმძღვანელს, შალვა რამიშვილს სექსუალურ შევიწროებაში ადანაშაულებდა აცხადებს, რომ მას საქმე სააპელაციო სასამართლოშიც მოუგო. ამის შესახებ სამხარაძემ ფეისბუქგვერდზე დაპოსტა.

როგორც On.ge-ს სამხარაძის ადვოკატმა, ანა არგნიშვილმა განუცხადა მეორე ინსტანციამ ძალაში დატოვა ის გადაწყვეტილება, რომლის მიხედვითაც სექსუალური შევიწროების გამო თათია სამხარაძეს კომპენსაცია ეკუთვნის. მისი თქმით, დასაბუთებული გადაწყვეტილება ჯერ არ ჩაბარებიათ.

მოპასუხე მხარემ, შალვა რამიშვილმა On.ge-ს განუცხადა, რომ სააპელაციოს გადაწყვეტილებას, უზენაეს სასამართლოში გაასაჩივრებს. სხვა დეტალებზე რამიშვილი სამოტივაციო ნაწილის გამოქვეყნებამდე არ საუბრობს.

დაახლოებით ორი წლის წინ, თათია სამხარაძემ თავის იმჟამინდელ უფროსს შალვა რამიშვილს, სექსუალურ შევიწროებაში დასდო ბრალი. თავად რამიშვილი სამხარაძის ბრალდებაას უარყოფდა და ცილისწამებას უწოდებდა. საქალაქო სასამართლოს გადაწყვეტილებით, შალვა რამიშვილს სამხარაძისთვის მორალური ზიანის ასანაზღაურებლად 2 000 ლარიანი ჯარიმა ჰქონდა დაკისრებული.