საერთაშორისო გამჭვირვალობა - საქართველოს ინფორმაციით, პარტიათა უმრავლესობა საქართველოში დიდი ჰიდროელექტროსადგურების აშენების მომხრეა, თუმცა ისინი განმარტავენ, რომ ჰესების აშენების ადგილას მაცხოვრებლები იმავე აზრზს უნდა იზიარებდნენ.

ინფორმაცია ამის შესახებ TI-ის ახალი საიტის - Chemikhma.ge-ის შედეგებზე დაყრდნობით გახდა ცნობილი. შედეგებიდან ჩანს, რომ გამოკითხული 7 პარტიიდან, მხოლოდ დემოკრატიული მოძრაობა - ერთიანი საქართველოა დიდი ჰიდროელექტროსადგურების აშენების წინააღმდეგი.

რაც შეეხება გირჩს, რესპუბლიკელებს, ენმ-ს, მრეწველებს, ეროვნულ ფორუმსა და თავისუფალ დემოკრატებს, ისინი განმარტავენ, რომ დიდი ჰესები უნდა აშენდეს, თუმცა, მხოლოდ იმ შემთხვევაში, თუ ამას ჰიდროელექტროსადგურის განთავსების ადგილზე მცხოვრები ადგილობრივი მოსახლეობა დასთანხმდება.

საერთაშორისო გამჭვირვალობა - საქართველომ ახალი ვებსაიტის, Chemikhma.ge-ს პრეზენტაცია დღეს გამართა. საიტზე შესული მომხმარებელი კითხვარს ავსებს, შემდეგ კი თავის პასუხებს სხვადასხვა პოლიტიკური პარტიების მიერ გაცემულ შესაბამის პასუხებს ადარებს, რომლებიც, თავის მხრივ, მათი საარჩევნო პროგრამების მიხედვითაა შევსებული.

კითხვები კატეგორიებად არის დაყოფილი, რომელშიც შედის სოციალურ-ეკონომიკური, გარემოსდაცვითი, საშინაო, ჯანდაცვის, საგარეო პოლიტიკისა და განათლების საკითხები. როდესაც მომხმარებელი კითხვარის შევსებას ასრულებს, მისთვის ნათელი ხდება, თუ რომელი პოლიტიკური პარტიის საარჩევნო პროგრამასთან აქვს თანმხვედრი შეხედულებები.

აღსანიშნავია, რომ TI-ის თხოვნის შესაბამისად, კითხვარი მხოლოდ 7-მა პარტიამ შეავსო. რაც შეეხება მოძრაობას პაატა ბურჭულაძე - სახელმწიფო ხალხისთვის, საქარველოს კონსერვატიული პარტიას, ლეიბორისტულ პარტიასა და პატრიოტთა ალიანსს, მათ კითხვარის შევსებისგან, სხვადასხვა მიზეზის გამო, თავი შეიკავეს.

კითხვარის შევსებაზე უარი ქართულმა ოცნებამაც თქვა.