რუსეთის კომუნიკაციების ფედერალურმა სამსახურმა, როსკონადზორმა ინტერნეტ კომპანია Google 500 ათასი რუბლით, ანუ 7,5 ათასი დოლარით დააჯარიმა. როგორც BBC-ის რუსული სამსახური წერს, მიზეზი კი ისაა, რომ კომპანიამ აკრძალული საიტების რეესტრთან დაკავშირებაზე უარი განაცხადა. ამ შემთხვევაში, გუგლში ძებნის დროს აკრძალული საიტები აღარ გამოჩნდებოდა.

კომპანია ფედერალურმა სამსახურმა ნოემბერში გააფრთხილა და "ხარვეზის გამოსასწორებლად" დრო მისცა. კანონის მიხედვით, მათ შეუძლიათ ჯარიმა სასამართლოს გარეშე დააკისრონ.

როგორც სამსახურის წარმომადგენლები ამბობენ, ისინი მანამ გააგრძელებენ ამერიკული კომპანიის დაჯარიმებას, სანამ სიტუაცია არ გამოსწორდება. გუგლის კორპორაციას ამასთან დაკავშირებით ჯერ კომენტარი არ გაუკეთებია.

რუსეთში 100 ათასზე მეტი საიტია აკრძალული, მათ შორის, Telegram, LinkedIn, მედიაგამოცემების რამდენიმე საიტი და ოპოზიციონერების საიტები, Grani.ru და Kasparov.ru.

კანონი, რომელიც ძებნის სისტემებს ფედერალურ სახელმწიფო საინფორმაციო სისტემაზე მიერთებას აიძულებს, მიმდინარე წლის სექტემბრიდან მოქმედებს. კომუნიკაციების სამსახურმა თავისი მოთხოვნა გუგლს, იანდექსა და მაილ.რუ-ს გაუგზავნა. მათივე თქმით, აღნიშნულ მოთხოვნას მხოლოდ ამერიკული კომპანია არ დაემორჩილა.