ამერიკის შეერთებული შტატების სახელმწიფო მდივანმა, მაიკ პომპეომ რუსეთს ულტიმატუმი წაუყენა და საშუალო და მოკლე მანძილის რაკეტების ლიკვიდაციის შესახებ შეთანხმების შესასრულებლად 60-დღიანი ვადა განუსაზღვრა. წინააღმდეგ შემთხვევაში, მაიკ პომპეოს თქმით, აშშ დატოვებს აღნიშნულ შეთანხმებას.

ნატო-ს ქვეყნების საგარეო საქმეთა მინისტრების შეხვედრის დასრულების შემდეგ მაიკ პომპეომ რუსეთი ხელშეკრულებით ნაკისრი ვალდებულებების შეუსრულებლობაში დაადანაშაულა. პომპეოს გაფრთხილებით, თუ რუსეთი ნაკისრ ვალდებულებებს 60 დღის ვადაში არ შეასრულებს, ვაშინგტონი ექვსი თვის შემდეგ დაიწყებს საშუალო რადიუსის ბირთვული იარაღის შესახებ ხელშეკრულების (INF) დასატოვებლად მზადებას.

"რუსეთი უნდა დაუბრუნდეს სრულ და მტკიცე თანხმობას. ჩვენს ერებს აქვთ არჩევანი. ჩვენ ან უნდა დავიწვათ სილაში ან საერთო ძალებით ვუპასუხოთ რუსეთის ქმედებებს", — განაცხადა მან.

პომპეომ თქვა, რომ რუსეთს შექმნილი აქვს SSC-8 ტიპის რაკეტის "მრავალრიცხოვანი ბატალიონები" და რომ რაკეტების რადიუსი მათ აქცევს "პირდაპირ საფრთხედ ევროპისათვის".

პომპეოს განცხადებით, ვაშინგტონი მოხარული იქნება თუ რუსეთი გადაწყვეტილებას შეცვლის, თუმცა არ ჩანს, რომ მოსკოვი ცდილობს შეასრულოს ნაკისრი ვალდებულებები. Washington Post -ის ცნობით, პომპეოს ხელშეკრულების დატოვების ზუსტი თარიღი არ დაუსახელებია, თუმცა მისი განცხადებები იძლევა ვარაუდის საფუძველს, რომ ეს აუცილებლად მოხდება.

ნატოს გენერალური მდივნის, იენ სტოლტენბერგის განცხადებით, ის დამწუხრებულია, რადგან ხედავენ საშუალო რადიუსის ბირთვული იარაღის შესახებ ხელშეკრულების სავარაუდო დასასრულს.

"იარაღის კონტროლის ვერანაირი შეთანხმება ვერ იმუშავებს, თუ მხოლოდ ერთი მხარე სცემს პატივს", — განაცხადა მან.

შეიარაღების კონტროლის ასოციაციის აღმასრულებელი დირექტორის, დარილ კიმბალის თქმით, ის ვერ ხედავს, რომ რუსეთი მზადაა დაემორჩილოს შეთანხმების პირობებს.

"ისინი აპირებენ კურსის შეცვლას", — განაცხადა მან.

მოსკოვში, საგარეო საქმეთა სამინისტროს პრესსპიკერის თქმით, რუსეთი მკაცრად იცავს შეთანხმებას და ამერიკის მხარე ამას მხედველობაში არ იღებს.

NATO-ს ქვეყნების საგარეო საქმეთა მინისტრების შეხვედრაზე ყურადღება გაამახვილეს რუსეთის ქმედებებზე უკრაინაში.

სტოლტენბერგმა რუსეთი დაადანაშაულა, რომ მან ყირიმის ნახევარკუნძული აღმოსავლეთ უკრაინის წყლებზე კონტროლის მოსაპოვებლად გამოიყენა.

"ოთხი წლის წინ რუსეთმა ყირიმის ანექსია მოახდინა. ახლა რუსეთი ცდილობს გამოიყენოს ყირიმი, რათა გააფართოვოს თავისი გავლება და კონტროლი აზოვის ზღვაზე", — განაცხადა სტოლტენბერგმა.

კითხვაზე, რა უნდა გააკეთოს ნატომ საზღვაო და საჰაერო პოლიტიკის განვითარებისთვის, მან უპასუხა, რომ "უკვე ძალიან ბევრი ნატოა შავ ზღვაში".

უკრაინის საგარეო საქმეთა მინისტრის, პავლო კრიმკინის თქმით, მათ სჭირდებათ კოორდინირებული პასუხი რუსეთის ქმედებებზე. მისივე თქმით, ნატო-უკრაინა-საქართველოს გადართოებულ შეხვედრაზე, ამ მხრივ გადასადგმელ რამდენიმე პრაქტიკულ ნაბიჯზე ისაუბრა.

მისი თქმით, შესთავაზა ნატოს, რომ აკრძალონ რუსული გემების შესვლა სხვა ქვეყნების პორტებში, თუ ის გააგრძელებს აზოვის ზღვის ბლოკადას.

საშუალო და ახლო მოქმედების რაკეტების ლიკვიდაციის შეთანხმება სსრკ-ის მაშინდელ პრეზიდენტს მიხეილ გორბაჩოვსა და აშშ-ის მაშინდელ პრეზიდენტს რონალდ რეიგანს შორის 1987 წლის 8 დეკემბერს გაფორმდა. ეს ცივი ომის ერთ-ერთ ყველაზე მნიშვნელოვან შეთანხმებად მიიჩნევა. მაშინ მოსკოვმა და ვაშინგტონმა უარი თქვა საშუალოდ ახლო მოქმედების ბალისტიკური და საკრუიზო რაკეტების შექმნაზე და არსებულის განადგურებაზე შეთანხმდნენ.